Женна Ортега “Уэнздей” сериалида сценарий муаллифларининг талабларини бажаришдан бош тортгани ва қаҳрамонининг сўзларини ўзгартиргани ҳақида гапириб берди

Женна Ортега нафақат Netflixънинг Аддамслар оиласи ҳақидаги сериалида бош рол — Уэнздейни ижро этди, балки суратга олиш жараёнларида ўз қаҳрамонининг образи ва характерига ўзгартиришлар киритди, деб хабар бермоқда “Правила жизни” нашри.

Актриса Декс Шепард ва Моника Падманнинг Армчаир эхперт подкастида “Уэнздей” сериалидаги образининг  характерини янада ҳақиқийроқ қилиш учун баъзи ҳолларда сценарийга ўзгартириш киритиб, иш тутгани ҳақида сўзлаб берди.

Унинг сўзларига кўра, сценарий муаллифларининг қатор талаблари образнинг характерига умуман маъно бермаган.

Севги учбурчагида бўлиш у учун ҳеч қандай маънога эга эмасди. У мактабдаги рақси учун кийган либоси ҳақида ҳам мана бундай дейиши керак эди: “О худойим, нақадар ажойиб! Бундай деганимга ишонолмайман. Ўзимдан нафратланаман”. Мен эса бу сўзларни айтмаслигимни эълон қилганман, — дейди актриса.

“Суратга олиш жараёнларида ўзимни профессионал даражада ҳис этмаган пайтларим бўлди, шунинг учун қаҳрамонимнинг сўзларини ўзгартира бошладим”, — дея қўшимча қилди Ортега.

Бундан ташқари, актриса сериалдаги рақс саҳнасини тубдан ўзгартирди, кейинчалик рақс томошабинлар орасида жуда машҳур бўлди. Ортега суратга олиш жараёнларидан бир неча кун олдин хореография машғулотлари билан шуғулланган ва сериал чиққандан кейин Уэнздейнинг рақси ижтимоий тармоқларда трендга айланди. Миллионлаб ижтимоий тармоқ фойдаланувчилари Ортеганинг ҳаракатларини такрорлайдиган видеоларни ўз саҳифасига жойлаштирди.

“Бу дастлаб флешмоб эди. У рақсга тушиши ва ҳамма уни такрорлаб, у билан рақсга тушиши керак эди. Мен рад этдим, чунки... нега у бунга рози бўлиши керак эди?”, — дейди Женна.

Актрисанинг таъкидлашича, у сценарий муаллифлари билан алоҳида гаплашиб, нима учун қаҳрамонининг сўзларни ўзгартираётганини тушунтиришга мажбур бўлган.

Ортега шу тарзда “Уэнздей” сериалидаги қаҳрамонини “ҳимоя қилганини” айтди. “Уэнздей” сериали 2022 йилда энг кўп томоша қилинган сериалга айланди. Шунингдек, сериал намойиш этилгандан бир ҳафта ўтиб, Netflixъда энг кўп томоша қилинган инглиз тилидаги лойиҳага айланди. Томошабинлар биринчи қисмни кўриш учун 341 миллион соатдан ортиқ вақт сарфлади.