Образига тушмаган: томошабинлар фикрига кўра ролига нотўғри танланган актёрлар

Баъзан лойиҳа томошабинларга ёқмаган биттагина персонаж туфайли ҳам барбод бўлиши мумкин. 

Ҳолли Бэйли — “Сув париси”

Май ойида энг кўп кутилган эртаклардан бири экранларга чиқади. “Сув париси” фильми премьерасидан анча олдин шов-шувга сабаб бўлган эди. Бунинг сабаби бош ролга тасдиқланган актриса. Гап шундаки, Ҳолли Бэйли афроамерикалик. Унинг ташқи кўриниши асл мультфильмдаги Сув париси образидан тубдан фарқ қилади. Кўплаб томошабинлар юлдузни камситишди ва лойиҳани олдиндан ёмонлашди. Ҳатто трейлерларнинг салбий баҳолари ижобий баҳолардан бир неча мингтага кўп бўлди. Ҳоллини томошабинлар Андерсен эртагидан билган Сув парисига ўхшамаслиги учун танқид қилмоқда. Бэйлини фақат чин мухлислар ва фильм ижодкорлари қўллаб-қувватламоқда.

Лиам Ҳемсворт — “Жодугар”

“Жодугар” сериалининг аввалги уч мавсумида бош ролни Генри Кавилл ижро этган эди. Актёрнинг улкан мухлислар армияси бор ва томошабинлар сериални, жумладан, ўз севимли юлдузларининг иштироки туфайли ҳам ёқтиришган. Ўтган йил кузида Генрининг Netflix билан шартномасини узайтирмагани ва Гералт ролидан воз кечгани маълум бўлди. Актёр ўз ўрнини Лиам Ҳемсвортга топширди, бироқ томошабинлар уни дарҳол салбий қабул қилишди. Уларни қисман тушунса бўлади, чунки машҳур сериалда бош актёрнинг алмаштирилиши асарни идрок этишни бутунлай ўзгартиради. Аммо Кавиллнинг айрим ашаддий мухлислари ҳаддан ошиб, лойиҳани бойкот қилишгача боришди. Айтганча, Ҳемсворт иштирокидаги янги мавсум фақат 2024 йил ноябрида эфирга чиқиши керак эди. Мухлислар актёрнинг ижросини кўрмасдан туриб, унинг муваффақиятсизликка учраётганига ишонишмоқда.

Адам Драйвер — “Юлдузлар жанги”

“Юлдузлар жанги: куч уйғониши” фильмида Адам Драйвер Кайло Рен ролини ижро этди. Танқидчилар унинг актёрлик маҳоратидан мамнун бўлса-да, томошабинлар уни муваффақиятсиз деб баҳолади. Бу сафар ҳам уларнинг норозилиги жиддий асосга эга эмасди. Кўпчиликка Адамнинг ташқи кўриниши ва хатти-ҳаракатлари ёқмади. Томошабинларнинг фикрича, Драйвер актёрдан шафқатсизлик ва ўзига хос таассурот талаб қиладиган ёвуз инсон ролига ҳали “етиб бормаган”. Кимгадир у етарлича келишган эмас, кимгадир эса ҳаддан ортиқ ёқимтой йигит бўлиб кўринди.

Жаред Лето — “Худкушлар гуруҳи”

 Томошабинлар Жаред Летони “Худкушлар гуруҳи” фильмидаги Жокер роли учун танқид қилишади. Танқидчиларнинг фикрича, ҳар бир актёр Жокерга ўзига хосликни олиб кирган ва уни кўп қиррали қилган. Лекин Жаред буни уддалай олмаган. Бундан ташқари, актёр суратга олиш майдончасида ҳам салбий таассурот қолдиради. Оммавий ахборот воситалари унинг кадр ортидаги қилиқлари — гоҳ Лето ўйин-кулги уюштириши, гоҳ ҳамкасбларини мазах қилиши ҳақида ёзишади. Улар Жаред ўз ишига ҳурматсизлик ва масъулиятсизлик билан қарайди, деб ҳисоблашади. Бундан ташқари, у бу қиёфада даҳшатли кўринишнинг уддасидан чиқолмаган.

Кетрин Зета-Жонс — “Уэнздей”

Кетрин Зета-Жонс “Уэнздей” фильмида Мортиша Аддамс ролига тасдиқланганида томошабинлар дарҳол норозилик билдиришади. Сериал энг юқори рейтинглилардан бирига айланган бўлса-да, уни танқид қилиш мумкин. Мухлисларнинг фикрига кўра, Кетрин ролни яхши ўйнай олмаган — унинг ташқи кўриниши ҳам бундай готик образга мутлақо мос келмайди. Томошабинлар фикрича, унга Мортишадаги дадиллик, қовоғи солиқлик ва “жодугар” васвасаси етишмаган. Кетрин эса Мортишанинг қиёфасига ўзига хос бўлмаган хушрўйлик бахш этади.

Роберт Паттинсон — “Бетмен”

Илгари Бетменни томошабинларнинг севимлисига айланган Бен Аффлек ўйнаган. Роберт Паттинсон суперқаҳрамон плашини кийиб кўрганида, мухлислар янги Бетмен “бошқа одам” деган фикрга келишади. Актёр ҳар доим озғинлиги билан ажралиб турарди ва аксарият мухлислар уни “Сумерки” фильмидаги бадқовоқ, рангпар вампир Эдвард Каллен сифатида эслаб қолишган. Ҳатто оддий ҳаётда ҳам Робертнинг нигоҳи анча совуқ. Унинг дунёни қутқаришга кучи етмаганга ўхшайди. Мухлислар бунга премьера арафасида фильм постерларини кўрганларида ишонч ҳосил қилишди. Улар янги Бетменни “зерикарли” ва “чарчаган” деб аташди.