Режиссёр Хван Дон Хек томонидан суратга олинган “Калмар ўйини 2” сериали рейтингларда рекорд кўрсаткичларни забт этишда давом этмоқда. Драма кетма-кет уч ҳафта давомида Netflix’нинг Global Top 10 Movies рейтингида 1-ўринни эгаллаб турибди.
Биринчи мавсумдаги ғолиб бўлганидан ўйинни ташкил қилган сирли ташкилотдан қасос олишни режалаштирган Сон Ки Хун ҳақидаги ҳикоянинг давоми бутун дунё бўйлаб томошабинлар эътиборини янада кўпроқ тортди.
6-12 январь кунларида сериал 26,3 миллион марта кўрилди ва 93 мамлакатда инглиз тилидаги ва инглиз тилида бўлмаган драмалар номинациясида 1-ўринни эгаллади. Атиги уч ҳафта ичида жами 152,5 миллион марта кўрилган “Калмар ўйини 2” Netflix платформасида энг кўп кўрилган сериаллар рейтингида учинчи ўринни эгаллади. Ҳозирда биринчи ўрин сериалнинг биринчи мавсумига тегишли, иккинчи ўринни эса “Уэнздей” лойиҳаси эгаллаган.
Маълумот учун, 2-мавсумда аввалги ўйиндан уч йил ўтгач содир бўлган воқеалар ёритилади. Унда ўйин ғолиби Ки Хун ютуқ пулига махсус кишиларни ёллаб, ўйин ташкилотчисини излаб топишни ва бундай шафқатсизликка чек қўйишни мақсад қилади. Сўнг унга бошловчи Хван Ин Хонинг укаси, полиция ходими Хван Чун Хо ёрдам беришга киришади. Натижада Ки Хун яна бир бор сўнгги — 456-рақамли иштирокчи сифатида ўйинга киритилади. Унинг шериклари эса ўйинлар бўлиб ўтаётган оролни қидиришга тушади. Уларга капитан Пак ёрдам беради.
Машҳур сериалининг сўнгги 3-мавсуми 2025 йилда чиқиши режалаштирилган. Унинг режиссёри лойиҳа премераси тахминан ёз фаслининг охири ёки куз фаслининг бошида бўлиши кераклигини айтган.
Изоҳ (0)