2022 йил ноябрь ойида интернетни Аддамслар қизи — Уэнздей ҳақидаги сериал забт этди. Шоу томошалар бўйича рекордларни янгилади ва бош қаҳрамоннинг рақси тармоқда вирусга айланди. Бундан ташқари, Қўлни ҳақиқий одам ўйнаганлиги ҳам маълум бўлди. Руминиядан келган кўзбойлоғич қандай қилиб персонажни янги босқичга олиб чиқиб, уни томошабинларнинг севимлисига айлантиргани ҳақида маълумот берамиз.
Қўл образи биринчи марта 1954 йилдаги оригинал комиксларда пайдо бўлган. Аддамслар уйининг кираверишида «Эҳтиёт бўлинг, Қўл» ёзуви бор эди — худди «Қопағон итдан эҳтиёт бўлинг» ёзувига ўхшаш. Кейинчалик бу ғоя фильм ва телекўрсатув ижодкорлари томонидан ишлаб чиқилган. Кейинчалик Қўл оиланинг ажралмас қисмига айланади — Аддамслар учун у ҳам уй ҳайвони, ҳам оила аъзоси.
Биринчи фильмларда персонаж камдан кам кўриниб, қути ёки бирор предмет орқасида пайдо бўлган. У махсус функцияларни бажармаган ва, албатта, асосий қаҳрамон эмасди. Кейинчалик Қўл ролини 1960 йиллардаги «Адамслар оиласи» телесериалида бош хизматкор ролини ўйнаган актёр Тед Кессиди ижро этади. Эркак одатда камераларда кўринмайдиган аравачада ётиб, қўлини қутидаги тешикдан чиқариб турган.
Янги сериалда эса бу ўзига хос ролни 25 ёшли Виктор Доробанту ўйнади. У Руминияда туғилган. Бунгача Виктор фокус кўрсатиш билан шуғулланган.
1991 йилги тўлиқ метражли фильмда Қўл яна «жонланади». 90 йилларнинг култ фильмида уни кўзбойлоғич Кристофер Харт ўйнаган. Қўл югуради, қаҳрамонларга ёрдам беради, улар билан мулоқот қилади. Интервьюда Доробанту дастлаб Кристофер билан бевосита гаплашмаган бўлса-да, унинг ижодидан илҳомланганини айтади. «Бир марта Кристофер Қўл хира бўлиб кўринмаслиги учун чўткани қандай тутиш кераклигини ўргатди», — деб тан олади у.
Кўзбойлоғичлар 90 йиллардаги Қўл ва ҳозиргиси икки хил қаҳрамон эканлигини яхши тушунишган. Ҳеч бўлмаганда ташқи кўриниши — янги сериалда бу «қаҳрамон» анча реал ва қўрқинчли кўринади. У поп-маданиятдан номақбул имо-ишораларни ҳам билади, умуман олганда, ўзини анча эркин тутади.
Суратга олиш жараёнларида Виктор бутун танасини қоплаган кўк рангли костюм кийиб олган. Бу монтаж пайтида ҳеч қандай муаммосиз уни кадрдан «кесиб олиш» учун керак эди. Кўзбойлоғич бу кийимда ўзини жуда қулай ҳис қилганини ва ҳамма нарсани мукаммал кўрганини айтади, чунки унинг кўзлари тўр билан қопланган эди. У ҳатто ёмон об-ҳавода ҳам костюм уни иситганини таъкидлайди.
Доробанту катта одам бўлгани учун жамоа уни камералардан яшириш учун кўп ҳаракат қилишига тўғри келган. У турли ўра ва чуқурчаларга ётиб, эшик ва деворлар орқасига яширинади. Баъзида суратга олиш гуруҳи Виктор жойлашиб олиши учун бутун декорацияни ҳам кўтаришига тўғри келади.
Биринчи кадрда Виктор каравот тагига ётиб, қўлини матрасдаги тешикдан чиқаради.
Қўл кўрсатадиган имо-ишоралар 50 фоизи реал ҳаётдаги имо-ишора тилларига асосланган. «Қолган 50 фоизи соф импровизация. Мен актрисанинг сўзларига жавоб беришга, ҳис-туйғуларимни ифодалашга ҳаракат қилдим», — дейди Доробанту.
Айтганча, дастлаб эркак уни кастингга таклиф қилишганига ишонмайди. «Аввалига буни ҳазил деб ўйладим. Мени кўндирмагунча қайта-қайта қўнғироқ қилишди. Кастингда бу ролни олишим даргумон эканлигини англадим — атрофда жуда кўп ажойиб кўзбойлоғичлар бор эди. Аммо охирида мен ўтиб кетдим», — дейди Виктор.
Айнан сериал режиссёри Тим Бертон персонажни ҳақиқий инсон ижро этишини талаб қилган. Женна Ортеганинг сўзларига кўра, Доробанту соатлаб тайёргарлик кўриши керак эди. «Бертон Қўлнинг гримига соатлаб вақт сарфлади. Қўл иштирок этган саҳналар жуда кўп вақтни олди», — дейди актриса.
Викторнинг айтишича, энг ноқулай жойларда ётгани Қўлни ўйнаш жуда қийин бўлганининг биргина сабаби эмас: «Барча ҳис-туйғуларни қўл орқали кўрсатиш керак эди. Унинг овози ҳам, субтитрлари ҳам йўқ. Бу жуда қийин жараён».
Бошқа актёрлар ҳам қийналган, албатта. Мисол учун, Женна Ортега кадрда ҳеч қачон кўзини пирпиратмаган – бу ҳам режиссёрдан чиққан ғоя эди.
Мавзуга доир:
- Фақат «Уэнздей» эмас: Жаҳон киноси тарихидаги энг ажойиб рақслар (видео)
- Уэнздей ролини қойилмақом ижро этган ва интернетни «портлатган» рақсни ўзи ўйлаб топган Женна Ортега ҳақида 20 та факт
- Ҳамманинг оғзида «Уэнздей»: нима учун Аддамслар оиласининг ғамгин қизи ҳақидаги сериал рекордларни янгиламоқда?
Изоҳ (0)