Ҳар йили турк киноижодкорлари томошабинларга ўнлаб янги лойиҳаларни ҳавола этади. Аммо эски турк сериаллари ҳам кўпчилик кўнглидан жой олган. Қуйида томоша қилишга арзигулик ажойиб ретро сериаллар тўпламини тайёрладик.
“Чолиқуши”, 1986
Бош ролларда: Айдан Шенер, Кенан Калав, Садри Алишик ва бошқалар.
Фериде холасининг уйида холаваччаси Комрон билан яшайди. Қиз улғайган сари акасига нисбатан қариндошлик туйғуларидан кўра бошқа ҳислар пайдо бўлаётганини англай бошлайди. У бор кучи билан сирини яширишга уринади, аммо бунинг уддасидан чиқа олмайди. Феридени ҳайратга солиб, Комрон ҳам унга муҳаббат изҳор қилади. Бироқ унаштирув куни Комроннинг Европадаги ҳаёти ҳақидаги ҳақиқатни билиб олгач, у холасининг уйини тарк этишга ва янги ҳаёт бошлашга қарор қилади. Лекин севгилисини ўйламаган биронта куни бўлмайди. Йиллар ўтиб, Фериде уйига қайтади ва биринчи марта Комрон билан очиқчасига суҳбатлашиш имконига эга бўлади.
Фериде ва Комроннинг муҳаббат қиссаси ҳар бир турк сериали мухлисига таниш. Бу ҳикоя Туркияда уч марта экранлаштирилган, аммо айнан 1986 йилдаги сериал барча актёрларнинг ажойиб ижроси туфайли алоҳида эъзозланади.
“Арғувонлар остида”, 2005
Бош ролларда: Булент Инал, Нур Сурер, Туба Буюкустун ва бошқалар.
Элиф — Йилмаз билан узоқ вақтдан бери муносабатда бўлиб келаётган ва у билан турмуш қуришни орзу қиладиган қиз. Бир куни Элиф ўзи ишлайдиган тўқимачилик корхонасига эгалик қилувчи оиланинг вориси Омер билан тасодифан танишиб қолади. Бу учрашув ёш қизни ўйга толдиради — у чиндан ҳам ҳаётини Йилмаз билан ўтказмоқчими ёки унинг бошқача келажаги ҳам борми? Яна Омернинг синглиси Филиз ҳам бор. Бу қиз ақлли, кўркам ва чин севгига ишонади. Бу тўрт кишининг тақдири кутилмаган тарзда чирмашиб кетади.
Ушбу сериалнинг ўзига хослиги шундаки, қаҳрамонларнинг ҳақиқий хислатлари вақт ўтиши билан намоён бўлади. Сюжет жуда қизиқарли бўлиб, томошабин эътиборини тўлиқ ўзига жалб этади. Актёрлар таркиби ниҳоятда муваффақиятли танланган.
“Ишкомли уй”, 2002
Бош ролларда: Ўзжан Дениз, Нургул Ешилчай, Шериф Сезер ва бошқалар.
Сейман машҳур оиланинг меросхўри. Отасининг ўлдирилишига гувоҳ бўлгач, уни Америкага жўнатишади. Айнан шу ерда у гўзал Баҳор билан танишади. Уларнинг дастлабки учрашуви ёқимли бўлмаса-да, бош қаҳрамонлар тез орада бир-бирлари учун яратилганликларини англашади. Сейман ва Баҳор Туркияда оила қуришга қарор қилишади ва йигит севгилисини уйига олиб келади.
“Ишкомли уй”да кўплаб замонавий турк сериалларидан фарқли ўлароқ, унда ҳар бир сўз ва ҳаракат мароқ билан тасвирланади. Шиддатли фильмлар мухлисларига бу сериал бир оз чўзилгандек туюлиши мумкин, бироқ сюжет ва актёрларнинг маҳорати бу камчиликни тўла қоплайди.
“Алия”, 2004
Бош ролларда: Санем Челик, Халит Эргенч, Илхон Шешен ва бошқалар.
Алия ва Синаннинг оиласи ташқи кўринишдан намунали — уларнинг ажойиб фарзандлари, чиройли уйи бор, эр-хотин эса бир-бирини жон-дилидан севади. Бироқ бир куни Алия эрининг анча вақтдан бери бошқа аёли борлигини билиб қолади. Бундан ташқари, ўша аёл яқин орада Синандан фарзанд кўриши кутилмоқда. Алданган аёл эрининг ҳеч қандай баҳонасини эшитишни ҳам истамайди. Алия нарсаларини йиғиштириб, Истанбулга кетади — у ҳаётини янгидан бошлашга аҳд қилади. Аммо унинг фарзандлари ота-онасининг ажрашиши ҳақида эшитишни ҳам хоҳламайди.
Бу ажойиб турк сериали кам сонли турк сериаллари мухлисларининг хотирасида сақланиб қолган. Халит ва Санемнинг ҳамкорлиги жуда жонли ва ёрқин чиққан. Улар ажрашиш арафасида турган эр-хотин образини жуда моҳирлик билан ижро этган.
“Синган юрак”, 2006
Бош ролларда: Туба Буюкустун, Жансел Элчин, Онур Сайлак ва бошқалар.
Мурат бой ва машҳур оиладан келиб чиққан, шунингдек, у нозик дидли ажойиб мусиқачи. Бир куни кўчада тасодифан Ҳасрет исмли қиз билан танишиб қолади. Бу гўзал қиз Туркиянинг камбағал маҳаллаларида ўсган ва жамиятдаги одоб-ахлоқ қоидалари ҳақида ҳеч нарса билмайди. Бироқ Ҳасрет ноёб овоз соҳибаси бўлиб, Мурат унга қизиқарли таклиф беради.
Нозик, таъсирчан ва серқирра сериал томошабинни шунчалик мафтун этадики, улардан кўз узиш жуда қийин.
Изоҳ (0)