Хонанда ва актриса Леди Гага Netflix’нинг оламшумул машҳурликка эришган “Уэнздей” сериалининг иккинчи мавсумида иштирок этади. Бу ҳақда Europa Plus хабар бермоқда. Суратга олиш ишлари аллақачон Европада бошлаб юборилган, деб ёзади Entertainment Weekly.
Ўтган йили иннетрвюлардан бирида “Уэнздей” сериали бош роли ижрочиси Женна Ортега шоунинг иккинчи мавсумида Леди Гагани кўришдан жуда мамнун бўлишини айтган эди. Актрисанинг сўзларига кўра, хонандага янги мактаб директори роли берилиши мумкин.
“Ишончим комилки, Netflix’га бу ғоя ёқади”, деди ёш актриса.
“Биласизми, бир вақтлар мен Леди Гага билан ишлаган сартарош билан ҳамкорлик қилганман ва мен уни бир неча йил олдин концертда кўрганман. Сартарош Леди Гагадан мен учун видеомурожаат ёзиб беришни илтимос қилган эди. Менимча, хонанда буни эслай олмайди. Аммо уни ҳозир кузатар эканман, ҳаётдаги барча нарса жуда тез суръатда ўзгариб боришини тушуняпман”, деди Женна Ортега.
Ҳозирча Леди Гага қайси образда намоён бўлиши ҳақида тафсилотлар ошкор этилмаган. Дастлаб сериал ижодкорлари хонандани бош ролга таклиф қилмоқчи эди, аммо Леди Гага ўта бандлиги сабаб кичик ролни ижро этишни маъқул кўрган. Бунинг устига, юлдуз 2025 йилнинг февраль ойида чиқиши режалаштирилган еттинчи альбоми устида ишламоқда.
2011 йилда Гаганинг “Born This Way” альбомидаги “Bloody Mary” қўшиғи машҳур бўлиб кетганидан сўнг кўплаб мухлислар қўшиқчини янги мавсумда чиқишини кутишган эди.
Эслатиб ўтамиз, Леди Гага кино соҳасида кўплаб телесериаллар ва фильмларда иштирок этган. Жумладан, октябрь ойида “Joker: икки кишилик телбалик” фильмининг премьераси бўлиб ўтди, унда Гага Ҳарли Квин образини гавдалантирган.
2022 йил ноябрь ойининг охирида Netflix’нинг “Уэнздей” сериали экранларга чиқди. Сериалда бош ролни ижро этган актриса Женна Ортега “Олтин глобус”да ўзининг расмий дебютини ўтказди, шу билан бирга, биринчи “Энг яхши рол” номинациясини олди. Лойиҳа қисқа вақт ичида машҳурликка эришди ва томошабинларнинг қалбидан жой олди. “Аддамс оиласи” ҳақидаги спин-офф 2022 йилнинг энг кўп томоша қилинган сериалига айланди.
Изоҳ (0)