Тошкентда 22 февраль куни Ўзбекистон бош вазири Абдулла Арипов Афғонистон бош вазири ўринбосари вазифасини бажарувчи Мулло Абдул Ғани Бародар билан икки томонлама музокаралар ўтказди, деб хабар бермоқда бош вазир матбуот котиби Бекзод Ҳидоятов.
Маълум қилинишича, учрашувда икки давлат ва халқлар ўртасидаги алоқалар дўстлик, ҳамкорлик ва яхши қўшничилик тамойилларига асослангани, Шавкат Мирзиёев Афғонистон билан барча соҳаларда конструктив ва ўзаро манфаатли алоқаларни ривожлантиришга алоҳида эътибор қаратаётгани таъкидланди.
Охирги йилларда мамлакатлар ўртасида савдо-иқтисодий ва маданий-гуманитар соҳалардаги алоқалар изчил ривожланиб бораётгани, ўтган йили “Термиз халқаро савдо маркази” очилгани икки томонлама савдони ривожлантиришга хизмат қилаётгани қайд этилди.
Учрашувда ўзаро манфаатли алоқаларни янада кенгайтириш, савдо-иқтисодий, энергетика, транспорт ва бошқа соҳаларда ҳамкорликни изчил ривожлантириш масалалари юзасидан атрофлича фикр алмашилди.
Хабарда айтилишича, Мулло Абдул Ғани Бародар бошчилигидаги делегация 23 февраль куни ҳам Ўзбекистонда бўлади. Афғонистон делегациясининг Ўзбекистонга ташрифи дастуридан Тошкент шаҳридаги бир қатор ишлаб чиқариш объектлари фаолияти билан яқиндан танишиш ҳам ўрин олган.
“Толибон” бош вазирининг иқтисодий масалалар бўйича ўринбосари Абдул Ғани Бародар ундан аввал бош вазир ўринбосари Жамшид Хўжаев билан учрашганди. Учрашувда савдо-транзит алоқаларини кенгайтириш, ўзбекистонлик инвесторларнинг Афғонистонга инвестиция киритиши масалалари муҳокама қилинди. Ўзбекистон томони икки томонлама савдо алоқаларини фаоллаштириш мақсадида икки давлат чегарасида қўшма савдо зонасини ташкил этишга тайёрлигини айтган. Ушбу савдо ҳудудида қарағай ёнғоғи ва пахтани қайта ишлаш заводлари, қадоқлаш ва логистика марказлари ҳамда турли озиқ-овқат маҳсулотлари ишлаб чиқариш цехлари жойлаштирилади.
Учрашувда ўзбекистонлик сармоядорлар Афғонистондаги нефть ва газни қидириш ҳамда қазиб олиш ишларида ҳамкорлик қилишга, саноат соҳасига, хусусан, Саманган вилоятида цемент заводи қуришга сармоя киритишга тайёр экани таъкидланган. Тоти Майдон газ конини ўрганиш бўйича сезиларли натижаларга эришилгани ва яқин келажакда қазиб олиш ишлари бошланиши маълум қилинди.
Ўзбекистон Афғонистон билан савдо айланмасини 3 млрд долларга оширмоқчи
Бош вазир Абдулла Арипов 2024 йил 17 август куни Кобулга ташриф буюрганди. Музокараларда Афғонистон билан савдо алоқаларини ривожлантириш, энергетика соҳасидаги самарали ҳамкорлик алоқаларини янги босқичга олиб чиқиш, мис, темир, нефть-газ конларини биргаликда ўзлаштириш лойиҳаларини амалга ошириш, шунингдек, транспорт-логистика, қишлоқ ва сув хўжалиги, таълим, ҳудудлараро муносабатларни янада чуқурлаштириш юзасидан фикр алмашилган.
Ўзаро савдо айланмасини 2024 йилда 1 миллиард долларга, яқин истиқболда эса 3 миллиард долларга етказиш бўйича барча имкониятлар мавжудлиги таъкидланганди.
Изоҳ (0)