“Толибон” ҳаракати Россия техникасидан фойдаланган ҳолда Афғонистон ҳаво мудофаа тизимини қурмоқчи. Бу ҳақда Forbes хабар берди.
![](/static/2024/09/11/photo_2024-09-11_12-44-42-wt7uzrDs.jpg)
Афғонистон муваққат ҳукумати 2023 йил бошида мамлакат бюджетининг энг катта улушини мудофаа учун ажратди. “Толибон” ҳаво ҳужумидан мудофаа тизимини қуришни мақсад қилганини айтди.
“Зенит ракеталари — мамлакатнинг эҳтиёжи. Шубҳасиз, Афғонистон уларни қўлга киритиш учун барча имкониятларни ишга солмоқда”, деган “Толибон” қўмондони қори Фасиҳиддин Фитрат.
29 август куни Афғонистон Мудофаа вазирлигининг моддий-техник таъминот бўлими бошлиғи генерал Саид Абдул Басир Сабери анча очиқчасига гапирди.
“Менимча, бизга ҳаво мудофааси ва ҳаво ҳудудини назорат қилиш учун ускуналар керак. Бизда ер усти ускуналари мавжуд. Халқаро-ҳуқуқий шароитлар юзага келганда, бундай маҳсулотларни халқаро даражада сиздан сотиб олишимизни ўйлайман”, деб таъкидлади Сабери.
Унинг баёноти Россия билан муносабатларнинг илиқлашуви фонида янгради. Жумладан, Россия май ойида “Толибон” расмийларини Санкт-Петербург форумига таклиф этди.
“Толибон” ҳаво ҳужумидан мудофаа тизимини қўлга киритиши АҚШни хавотирга солиши мумкин, яъни АҚШ томонидан учирилган дронлар мазкур тизим томонидан тутиб олинади. Март ойида “Толибон” Америка дронлари мамлакат ҳаво ҳудудини “бузаётгани”ни таъкидлаганди.
Европа сиёсатини таҳлил қилиш марказининг “Демократик барқарорлик” дастури катта илмий ходими Павел Лузин Россиянинг яқин келажакда толибларга замонавий қурол-яроғ сотишига шубҳа билдирмоқда ва Саберининг баёнотини Кремль учун “ширин сўз” деб баҳоламоқда.
“ъТолибонъ бир нечта ҳаво мудофааси тизимларини олишни истайди, бироқ ҳозирча уларни сотиб олишга тайёр эмас. Россиянинг қурол-яроғ етказиб бериш бўйича кўп йиллик тажрибаси бўлишига қарамай, бу ерда хоҳиш-истак ҳақиқат сифатида тақдим этилмоқда.
Бундан ташқари, ҳаво ҳужумидан мудофаа бўйича ҳар қандай битим Россия тизимни шунчаки жавондан олиб беришини англатмайди.“Бук”, “Тор” ёки “Пансир” каби ҳаво ҳужумидан мудофаа тизимларини Афғонистонга етказиб беришнинг ягона имконияти — уларни экипажлар билан бирга жўнатиш. ъТолибонъ бу тизимларни бошқаришни яхши ўзлаштирмаган”, дейди Лузин.
Изоҳ (0)