Афғонистон Олий таълим вазирлиги 500 нафар афғон талабанинг Россияга ўқишга боришини тақиқлади, дея Афғонистоннинг “Толибон” ҳаракатига мухолиф бўлган “Ҳашт-э Собҳ” газетаси хабар берди.
Сўнгги уч йил мобайнида толиблар нафақат афғон қизлари ва аёлларини ижтимоий, таълим ва илмий ҳаётнинг барча жабҳаларидан маҳрум этди, балки эркаклар учун ҳам кўплаб чекловлар жорий қилди. Гуруҳ талабалар “Россияга мусулмон бўлиб кетиб, уйга коммунист бўлиб қайтади” деган баҳонани рўкач қилиб, уларнинг кетишига тўсқинлик қилмоқда, деб ёзади нашр.
Нашрнинг хабар беришича, Афғонистон Олий таълим вазирлиги яқинда 500 нафар талабанинг Россияга боришини яна бир бор тақиқлаб, “уларнинг эътиқодлари у ерда бузилиши мумкинлигини” айтган. Россия стипендияларига даъвогар бўлган талабалар 2023 йилда рўйхатдан ўтганликларини ва 2024 йилда имтиҳонларни муваффақиятли топширганларидан сўнг барча маъмурий тартиб-қоидаларни бажарганликларини таъкидлашмоқда.
Талабаларнинг айтишича, кенг тарқалган қашшоқлик ва ишсизликка қарамай, уларнинг ҳар бири сафар ҳужжатлари ва тиббий кўриклар учун 100 доллардан 150 долларгача маблағ сарфлаган.
Бир неча ойлик кутиш ва кўплаб учрашувлардан сўнг, Россия элчиси ва Кобулдаги Россия фан ва маданият уйи раҳбари талабаларга муаммоларни Россия эмас, балки Афғонистон Олий таълим вазирлиги келтириб чиқараётганини маълум қилдим, деб ёзади “Ҳашт-э Собҳ”.
Стипендия олишга даъвогар талабалар, “Толибон”нинг бу ҳаракатлари ёшларнинг ёрқин келажак ва олий маълумот олиш каби асосий ҳуқуқларини рад этиш эканлигини таъкидламоқдалар.
Талабалар Россия ҳукуматини уларнинг муаммосини ҳал қилиш учун “Толибон" ҳаракати билан мулоқот ўрнатишга чақирмоқда. Уларнинг айтишича, ўтмишда ҳам толиблар афғон талабаларининг Россияда таълим олишига тўсқинлик қилган, аммо Россия талабаларга Эрон орқали ўқув визаларини олиш ва тегишли университетларга ўқишга киришда ёрдам берган.
Нашр билан суҳбатда бўлган яна бир афғон талабасига кўра, Афғонистон Олий таълим вазирлиги амалдорлари талабаларнинг эътиқодлари Россияда бузилишини, айнан шунинг учун у ерда ўқишга рухсат берилмаганини айтган.
Изоҳ (1)
Qarshi tarafda shunday real farazlar borki, ular borib ham o'qib, ham ishlab, ham "qatnashib" o'zlari istamagan hollarda, hozirgi boshqaruvning qaltis imidjiga ortiqcha "bo'yoq" chaplab qo'yishlari mumkin, menimcha. "U yerdagilarga" ham oson tuti bo'lmaydi...