Ўзбекистон ва Афғонистоннинг ўзаро савдо ҳажмини 3 миллиард долларга етказиш бўйича аниқ чора-тадбирлар белгиланди. Бу ҳақда Инвестициялар, саноат ва савдо вазирлиги матбуот хизмати хабар бермоқда.
Маълум қилинишича, 1 март куни Ўзбекистон инвестициялар, саноат ва савдо вазири Лазиз Қудратов Сурхондарё вилоятидаги “Термиз” халқаро савдо марказига ташриф буюрган Афғонистон савдо вазири Нуруддин Азизий бошчилигидаги делегация билан учрашув ўтказди.
Конструктив фикр алмашиш чоғида икки томонлама Ўзбекистон—Афғонистон савдо-иқтисодий муносабатларининг бугунги ҳолати ва уни ривожлантириш истиқболлари муҳокама қилинди. Суҳбат давомида ўзаро савдо ҳажмини 3 миллиард долларга етказиш бўйича аниқ чора-тадбирлар белгиланди.
-wF7A5E3f.jpg)
Савдо билан бир қаторда қишлоқ хўжалиги, тўқимачилик, фармацевтика, озиқ-овқат ва тоғ-кон саноати соҳаларида ҳам ўзаро манфаатли ҳамкорлик ва саноат кооперациясини кенгайтириш бўйича навбатдаги тадбирлар кўриб чиқилди.
Ташриф доирасида ҳар икки томондан 60 га яқин тадбиркорлар иштирокида B2B музокаралари ташкил этилиб, унда ишбилармон доиралар вакиллари янги алоқаларни ўрнатиш, янги қўшма лойиҳалар ва савдо шартномаларини амалга оширишнинг амалий жиҳатларини муҳокама қилиш имконига эга бўлди.
“Термиз” халқаро савдо маркази 2024 йилнинг августида очилганди. У Марказий Осиёдаги биринчи эркин савдо зонаси ҳисобланади. Зонада барча давлат фуқароларининг 15 кун давомида Ўзбекистонга кириш визасини расмийлаштирмасдан кириш ва чиқиш имконияти, савдо ва хизматларни сотишда мултивалюта тизими ва марказ ҳудудига келувчи товарларни “божхона тўловларисиз” жойлаштириш режими жорий этилган. Халқаро эксперт ва мутахассислар ушбу эркин савдо зонасига йилига 1,5 миллион ташриф буюрувчилар келиши ҳамда йиллик савдо айланмаси қарийб 1 млрд долларга етказиш салоҳияти мавжудлигини қайд этган.
2024 йил октябридан икки мамлакат ўртасида имтиёзли савдо келишув битими ишга тушган. Битим доирасида келишилган қатор маҳсулотларга, шу жумладан, Афғонистонда қишлоқ хўжалиги маҳсулотлари, гиламларга, айрим қурилиш материалларига импорт божлари бекор қилинган.
Ўзбекистон—Афғонистон савдо айланмасини ошириш режаси
Бош вазир Абдулла Арипов 2024 йил августида Кобулга ташрифи давомида ўтказилган музокараларда Афғонистон билан савдо алоқаларини ривожлантириш, энергетика соҳасидаги самарали ҳамкорлик алоқаларини янги босқичга олиб чиқиш, мис, темир, нефть-газ конларини биргаликда ўзлаштириш лойиҳаларини амалга ошириш, шунингдек, транспорт-логистика, қишлоқ ва сув хўжалиги, таълим, ҳудудлараро муносабатларни янада чуқурлаштириш юзасидан фикр алмашилганди. Ўзаро савдо айланмасини 2024 йилда 1 миллиард долларга, яқин истиқболда эса 3 миллиард долларга етказиш бўйича барча имкониятлар мавжудлиги таъкидланганди.
Афғонистон савдо вазири Нуруддин Азизий ҳам Ўзбекистон билан савдо ҳажмини йилига 3 миллиард долларга етказиш бўйича ишлар олиб борилаётгани айтганди.
2025 йил 22 февраль куни Тошкентда Абдулла Арипов “Толибон” бош вазирининг иқтисодий масалалар бўйича ўринбосари Абдул Ғани Бародар билан икки томонлама музокаралар ўтказди. Учрашувда ўзаро манфаатли алоқаларни янада кенгайтириш, савдо-иқтисодий, энергетика, транспорт ва бошқа соҳаларда ҳамкорликни ривожлантириш масалалари юзасидан фикр алмашилди.
Шу куни Абдул Ғани Бародар Ўзбекистон бош вазири ўринбосари Жамшид Хўжаев билан ҳам учрашди. Учрашувда савдо-транзит алоқаларини кенгайтириш, ўзбекистонлик инвесторларнинг Афғонистонга инвестиция киритиши масалалари муҳокама қилинди. Ўзбекистон томони икки томонлама савдо алоқаларини фаоллаштириш мақсадида икки давлат чегарасида қўшма савдо зонасини ташкил этишга тайёрлигини айтган.
Изоҳ (0)