Ўзбекистон Афғонистонга электр узатиш линиясини қуриш лойиҳаси қийматини 30 млн долларга пасайтиришга рози бўлди. Бу ҳақда Аmu TV хабар бермоқда.
Афғонистон бош вазири ўринбосари вазифасини бажарувчи Мулло Абдул Ғани Бародарнинг айтишича, Ўзбекистондан Афғонистондаги Дашти Алвонга 500 кВт электр энергиясини ўтказиш бўйича лойиҳа қийматининг 252 млн доллардан 222 млн долларга туширилгани муҳим ютуқлардан бири бўлган.
Таъкидланишича, Ўзбекистон ёз ойларида Афғонистонга электр энергияси экспортини ошириш ва шу билан бирга тарифларни камайтиришга келишиб олган.
Эришилган келишувлар доирасида Ўзбекистон Афғонистон қишлоқ хўжалиги маҳсулотларини етказиб беришга қўйилган чекловларни бекор қилади ва икки давлатнинг йирик шаҳарларида тўртта савдо маркази очади.
Шунингдек, Ўзбекистон ва Афғонистон Ҳайратон-Ҳирот темирйўли қурилиши бўйича келишувга эришилгани айтилди. Бародарнинг сўзларига кўра, Ўзбекистон томони техник-иқтисодий асосларни тайёрлаш учун ўз гуруҳини жўнатади.
Таъкидланишича, лойиҳанинг дастлабки техник баҳолаш харажатлари Ўзбекистон томонидан қопланади. Темир йўл лойиҳаси Ўзбекистон билан чегарадош муҳим порт шаҳри бўлган Ҳайратондан Мозори Шариф орқали Афғонистон ғарбидаги Ҳиротгача бўлган мавжуд йўналишни кенгайтиришни назарда тутади.
2010 йилда лойиҳанинг биринчи босқичида Осиё тараққиёт банки молиявий кўмагида Ҳайратон ва Мозори Шарифни боғловчи 75 км лик темирйўл линияси қурилди. Ушбу йўналиш Афғонистон ва Марказий Осиё давлатлари ўртасидаги савдо алоқаларини мустаҳкамлашнинг асосий элементига айланди.
Режалаштирилган кенгайтириш Мозори Шарифни бир қанча вилоятлар орқали Ҳирот билан боғлашни кўзда тутади. Лойиҳа Марказий Осиёни Яқин Шарқ билан боғловчи стратегик аҳамиятга эга транспорт йўлагини яратиши, бу эса ўз навбатида минтақавий савдо-иқтисодий интеграцияни рағбатлантириши кутилмоқда.
Аввалроқ Ўзбекистон бош вазири Абдулла Арипов Афғонистон бош вазири ўринбосари вазифасини бажарувчи Мулло Абдул Ғани Бародар билан икки томонлама музокаралар ўтказгани ҳақида хабар берилганди.
Учрашувда ўзаро манфаатли алоқаларни янада кенгайтириш, савдо-иқтисодий, энергетика, транспорт ва бошқа соҳаларда ҳамкорликни изчил ривожлантириш масалалари юзасидан атрофлича фикр алмашилган.
“Толибон” бош вазирининг иқтисодий масалалар бўйича ўринбосари Абдул Ғани Бародар ундан аввал бош вазир ўринбосари Жамшид Хўжаев билан учрашганди. Учрашувда савдо-транзит алоқаларини кенгайтириш, ўзбекистонлик инвесторларнинг Афғонистонга инвестиция киритиши масалалари муҳокама қилинди. Ўзбекистон томони икки томонлама савдо алоқаларини фаоллаштириш мақсадида икки давлат чегарасида қўшма савдо зонасини ташкил этишга тайёрлигини айтган. Ушбу савдо ҳудудида қарағай ёнғоғи ва пахтани қайта ишлаш заводлари, қадоқлаш ва логистика марказлари ҳамда турли озиқ-овқат маҳсулотлари ишлаб чиқариш цехлари жойлаштирилади.
Учрашувда ўзбекистонлик сармоядорлар Афғонистондаги нефть ва газни қидириш ҳамда қазиб олиш ишларида ҳамкорлик қилишга, саноат соҳасига, хусусан, Саманган вилоятида цемент заводи қуришга сармоя киритишга тайёр экани таъкидланган. Тоти Майдон газ конини ўрганиш бўйича сезиларли натижаларга эришилгани ва яқин келажакда қазиб олиш ишлари бошланиши маълум қилинди.
Ўзбекистон Афғонистон билан савдо айланмасини 3 млрд долларга оширмоқчи
Бош вазир Абдулла Арипов 2024 йил 17 август куни Кобулга ташриф буюрганди. Музокараларда Афғонистон билан савдо алоқаларини ривожлантириш, энергетика соҳасидаги самарали ҳамкорлик алоқаларини янги босқичга олиб чиқиш, мис, темир, нефть-газ конларини биргаликда ўзлаштириш лойиҳаларини амалга ошириш, шунингдек, транспорт-логистика, қишлоқ ва сув хўжалиги, таълим, ҳудудлараро муносабатларни янада чуқурлаштириш юзасидан фикр алмашилган.
Ўзаро савдо айланмасини 2024 йилда 1 миллиард долларга, яқин истиқболда эса 3 миллиард долларга етказиш бўйича барча имкониятлар мавжудлиги таъкидланганди.
Изоҳ (0)