Покистон ва Афғонистон хавфсизлик кучлари яқинда ёпилган икки мамлакат ўртасидаги асосий чегара ўтиш пунктида ўт очиши оқибатида камида бир киши ҳалок бўлди. Бу ҳақда Al Jazeera хабар берди.
Афғонистон Ички ишлар вазирлиги Torxам ўтиш жойидаги тунги тўқнашувларда бир аъзоси ҳалок бўлгани ва иккитаси яраланганини тасдиқлади. Torxам муҳим транзит пункт ҳисобланади. Покистон уни ўтган ойда қўшнисининг янги чегара пости қурилиши билан боғлиқ келишмовчиликлар туфайли ёпиб қўйган эди.
Покистон хавфсизлик хизматининг икки ходими, исмини ошкор этмаслик шарти билан тўқнашувларда уларнинг хавфсизлик кучлари аъзолари ҳам жароҳатлангани ҳақида хабар берди. Ҳодисага нима сабаб бўлганини томонлар очиқламаган.
Тўқнашув оқибатида қаҳратон қиш шароитида чегаранинг ҳар икки томонида зарурий товарлар ортилган 5 мингга яқин юк машинаси тўхтаб қолган. Аввал ҳам икки давлат Torxам ва жануби-ғарбий Чамандаги чегара ўтиш пунктларини отишмалар ва тўқнашувлардан сўнг ёпган эди.
Покистон Афғонистон ҳудудидан ҳужумларга дуч келаётганини таъкидламоқда, аммо “Толибон” ҳукумати буни инкор этмоқда. 2024 йил декабрь ойида Покистон ҳарбий самолётлари Афғонистон ҳудудига зарба бериб, ўнлаб одамларнинг ҳалок бўлишига сабаб бўлган.
Кобулдаги Ички ишлар вазирлиги матбуот котиби Абдул Матин Қани 3 март куни Покистонни тунги зўравонликни бошлашда айблади. Шундан сўнг Афғонистон хавфсизлик кучлари мулоқотга уринишлари натижа бермагач, “мудофаа ҳолатига” ўтганини ва жавоб қайтарганини билдирди.
Номи ошкор этилмаслик шарти билан гапирган Покистон расмийси Associated Press нашрига хабар беришича, “Толибон” ҳеч қандай сабабсиз Покистоннинг чегара постига автоматик қуроллардан ўқ узган. Покистон ҳарбийлари эса бунга жавобан ўт очгани айтилмоқда.
Покистоннинг ўтиш жойида жойлашган Ҳайбар тумани савдо-саноат палатаси президенти Юсуф Афридига кўра, Torxамнинг ёпилиши камида 15 миллион доллар зарар келтирган.
Афғонистондаги Нангарҳор савдо ва инвестиция палатаси бош ижрочи директори Шакируллаҳ Сафи эса афғон савдогарлари кунига 500 минг доллар йўқотаётганини айтмоқда.
Покистон Ташқи ишлар вазирлиги маълумотларига кўра, 2024 йилда икки мамлакат ўртасидаги савдо айланмаси 1,6 миллиард доллардан ошган.
Изоҳ (0)