Россия “Толибон” ҳаракатини тан олгач, Афғонистоннинг Шанхай ҳамкорлик ташкилотига аъзолик номзодини қўллаб-қувватлайди. Бу ҳақда Россия президентининг Афғонистон бўйича махсус вакили Замир Кабуловга таяниб, “ТАСС” хабар берди.
“Аммо бу фақат тан олиш масаласи эмас. ШҲТ биринчи навбатда иқтисодий ташкилотдир. Шунинг учун Кобул ўз иқтисодини тартибга келтириши керак, шунда ташкилотнинг қолган аъзолари Афғонистоннинг аъзолигини мақсадга мувофиқ деб ҳисоблайди”, — деди Кабулов.
Ҳозирда Афғонистон ШҲТда кузатувчи давлат мақомига эга. Аммо ҳеч бир давлат “Толибон” ҳукуматини тан олмагани учун ҳаракат вакиллари ташкилот йиғилишларида қатнаша олмайди. Россия Ташқи ишлар вазирлиги ва Адлия вазирлиги 27 май куни президент Владимир Путинга “Толибон”ни тақиқланган ташкилотлар рўйхатидан чиқаришни тавсия қилган. Эртаси куни Тошкент аэропортида матбуотга нутқ сўзлаган Россия президенти “Толибон” ҳозирда бутун Афғонистонни назорат қилаётгани учун “Москва ўз вакиллари билан муносабатларни бугунги воқеликдан келиб чиқиб йўлга қўйишини” айтган. 3 июнь куни Қозоғистон “Толибон”ни террорчи ташкилотлар рўйхатидан чиқарган.
Хитой, Россия, Қозоғистон, Қирғизистон, Тожикистон, Ўзбекистон, Эрон, Ҳиндистон ва Покистон Шанхай ҳамкорлик ташкилотига аъзо. Афғонистон ва яна тўрт давлат ушбу ташкилотга кузатувчи сифатида таклиф этилган.
Изоҳ (0)