МДҲ давлатлари ва Толибон разведка соҳасидаги ҳамкорликдан ўзаро манфаатдор. Бу ҳақида Остона шаҳрида бўлиб ўтган МДҲга аъзо давлатлар хавфсизлик идоралари ва махсус хизматлари раҳбарлари кенгашининг 55-йиғилишида Россия Федерацияси Федерал Хавфсизлик Хизмати (ФСБ) директори Александр Бортников айтиб ўтди.
У, шинингдек, “Толибон” Афғонистонда ҳақиқий кучга эга эканини ва мамлакатни назорат қилаётганини, уларнинг ҳаракатлари тартиб ўрнатиш ва барқарорликни сақлашга қаратилганини эслатиб ўтди.
Александр Бортниковнинг таъкидлашича, “Исломий давлат”нинг афғон бўлими бўлган “Хуросон вилояти”га қарши биргаликда кураш олиб бориш доирасида “Толибон” ҳаракати билан алоқалар ўрнатиш муҳим.
Бундан ташқари, ФХХ раҳбари МДҲ мамлакатларида террорчиларнинг потенциал тарафдорларини аниқлаш мақсадида “Толибон” билан ҳамкорликда иш олиб бориш зарурлигини қайд этди.
Маълум қилинишича, Россия “Толибон”ни террорчилик ташкилотлари рўйхатидан чиқариш масаласини кўриб чиқмоқда.
Бу ҳақда Россия президентининг Афғонистон бўйича вакили Замир Кабулов маълум қилди. Унинг сўзларига кўра, қарор аллақачон юқори даражада қабул қилинган ва тез орада эълон қилинади.
Изоҳ (0)