“Толибон” етакчиси Ҳайбатуллоҳ Охундзода 30 март куни Рамазон ҳайити муносабати билан қилган мурожаатида аҳолини хавфсизлик учун шукроналик келтиришга чақирди. Бу ҳақда “Дарё” мухбири хабар берди.
Афғонистондаги масжидларида минглаб намозхонлар иштирокида ҳайит намози ўқилди. “Толибон”нинг Ҳаж ва ҳидоят вазирлиги масжид воизларидан “Толибон” етакчисининг мурожаатини тушунтиришни сўради.
Рамазон ҳайити муносабати билан “Толибон”га алоқадор оммавий ахборот воситалари томонидан эълон қилинган мурожаатда “Афғонистон бўйлаб хавфсизлик таъминлангани ва одамлар шукр қилиши кераклиги” таъкидланган.
Ҳайит табригининг яна бир қисмида “Толибон” етакчиси мамлакатдаги таълим “шариат ва ёшларнинг исломий эътиқодлари асосида фаолият юритиши керак”лигини айтган. Аммо у ҳайит табрикларида қизлар ва аёлларнинг таълим олиши, мактаб ва олий ўқув юртлари эса қайта очилиши ҳақида гапирмаган.
“Дарё” мухбири Афғонистоннинг Мозори Шариф шаҳри аҳолиси билан Рамазон ойи қандай ўтгани борасида ҳам суҳбатлашган эди. Аҳоли бу ойда қашшоқлик ва ишсизликдан азият чеккан бўлиб, оғир иқтисодий, ижтимоий ва сиёсий вазият сабаб кундалик таом тайёрлашда қийинчиликка дуч келишган.
Мозори Шариф шаҳрида яшовчи 12 ёшли Нақибулла “Дарё” мухбири билан суҳбатда отасини урушларда йўқотгани, шу сабабли иқтисодий муаммоларга дуч келганини маълум қилган. “Ифторда ҳам, саҳарликда ҳам овқатимиз йўқ”, деди Нақибулла.
Рўза тутишга одатланиб қолганмиз, чунки Рамазон ойи бўлмаса ҳам, кўп кеча-ю кундуз оч қоламиз, оч ухлаймиз, дея қўшимча қилган болакай.
Мунис исмли яна бир эркак ифтор пайти турли таомлар пишириб, юртдошларига ёрдам беришини айтган эди.
Изоҳ (0)