Россия Адлия ва Ташқи ишлар вазирликлари президент Владимир Путинга мурожаатнома йўллаб, “Толибон”ни тақиқланган ташкилотлар рўйхатидан ўчиришни сўраган. Бу ҳақда Россиянинг Афғонистон бўйича махсус вакили Замир Кабулов берган маълумотга асосланиб, Hasht-e Subh Daily нашри хабар берди.
Замир Кабулов ушбу таклиф Россиянинг бир қатор ҳукумат институтлари томонидан қўллаб-қувватланганини айтган. Ушбу ҳолат Россия ва “Толибон” алоқаларида муҳим омил эканлиги таъкидланган.
“Аммо ҳали ҳам баъзи тўсиқларни енгиб ўтиш керак, шундан кейин Россия раҳбарияти бу борада узил-кесил қарор қилади”, — дейилган Россия вакилининг баёнотида.
“Толибон” Россия билан яқин муносабатларга эга. Аммо Москва ҳозирча бу гуруҳ режимини тан олгани йўқ. Шу билан бирга “Толибон” Россия ҳудудида тақиққа эга.
Москва ҳар доим Толибон томонидан инклюзив ҳукумат ўрнатишни талаб қилиб келади. Мамлакатдаги барча этник гуруҳлар ҳамкорлигидаги бошқарув жорий этилишини рағбатлантиради.
Олдинроқ Замир Кабулов “Толибон” Россиянинг душмани эмаслигини ва мамлакатларнинг ўзаро алоқалари кенгайиб бораётганини айтган эди.
“Толибон”ни тақиқдан чиқариш ҳақидаги қарор матни Россия президенти столида экани маълум қилинган. Агар у имзоланса, Россия ҳукумати томонидан Афғонистондаги ҳукмрон гуруҳни тан олиш борасидаги тўсиқ йўқолади.
Изоҳ (0)