Бирлашган Миллатлар Ташкилоти “Толибон” ҳаракатининг Доҳада бўлиб ўтадиган Афғонистон бўйича конференциясида иштирок этиш ниятини олқишлайди ва бу Толибон ва халқаро ҳамжамият ўртасида ишонч ўрнатиш жараёнини бошлаш учун зарур, деб ҳисоблайди.
Биз жараённи давом эттиришга ва муҳим маслаҳатлашув механизмини сақлаб қолишга ҳаракат қилмоқдамиз. Доҳадаги конференцияда “Толибон” расмийларнинг унда иштирок этишга тайёрланаётгани ҳақидаги баёнотини олқишлаймиз, — деб таъкидлади БМТ Бош котибининг Афғонистон бўйича махсус вакили Роза Отунбоэйва.
Вакил халқаро ҳуқуқий мажбуриятларини ҳурмат қилган ҳолда Афғонистоннинг халқаро ҳамжамиятга тўлиқ реинтеграциялашувини мустақил баҳолашда кўрсатилган мақсадга эътиборни қаратишни зарур деб ҳисоблаган.
Аввалроқ “Толибон” вакили Забиҳуллоҳ Мужоҳид Толибон 30 июнь—1 июль кунлари Доҳада бўлиб ўтадиган Афғонистон бўйича БМТ конференциясида иштирок этишини маълум қилган. 11 июнь куни Россия президентининг Афғонистон бўйича махсус вакили, Ташқи ишлар вазирлигининг иккинчи Осиё департаменти директори Замир Кабулов режалаштирилган анжумандаги иштироки ҳақида хабар берган.
Доҳада БМТ шафелигидаги сўнгги конференция февраль ойида бўлиб ўтган, унда 25 та давлат вакиллари Афғонистон билан ўзаро ҳамкорлик бўйича “йўл харитаси”ни муҳокама қилган. “Толибон” уларни қўллаб-қувватламаган афғон фаолларининг конференцияга таклиф қилинишига ҳам, унинг кун тартибига ҳам рози эмаслигини билдириб, йиғилишда қатнашишдан бош тортган эди.
Изоҳ (0)