АҚШнинг Нью Йорк штатида 10 апрель куни авиаҳалокат юз берди. Вертолёт Гудзон дарёсига қулаб тушиши оқибатида 6 киши ҳалок бўлди. Бу ҳақда BBC хабар берди.
Вертолёт бортида учувчи ва испаниялик сайёҳлар оиласи бўлган: икки нафар катта ёшли ва уч нафар бола. Ҳалокат сабаблари номаълум. Вертолёт дарёга деярли вертикал равишда қулаб тушган. Авиатехника сайёҳлар учун шаҳар узра парвозларни амалга оширган New York Helicopters компаниясига тегишли. Ҳалокатдан олдин вертолёт бир неча бор Манҳеттен ва Гудзон бўйлаб парвоз қилган.
Вертолётнинг модели — Bell 206L-4 LongRanger IV, бу турдаги вертолётлар одатда етти кишига мўлжалланган. Бортдагиларнинг бари ҳалок бўлган. Нью Йорк полицияси қурбонларнинг шахси уларнинг яқин қариндошларига хабар берилгач, оммага эълон қилинишини айтди.
АҚШда самолётлар иштирокидаги сўнгги авиаҳодисалар:
5 январь Аляска ярим оролида АҚШнинг F-35А қирувчи самолёти қулаб тушди. Учувчи катапульта қилишга улгурди ва тирик қолди.
30 январь куни эрталаб American Airlines йўловчи самолёти Вашингтон аэропорти яқинида ҳарбий вертолёт билан тўқнашдин, сўнгра Потомак дарёсига қулади. Оқибатда ҳеч ким омон қолмади, 5 февраль куни авиаҳалокатда ҳалок бўлган барча 67 кишининг жасади Вашингтондаги дарёдан олиб чиқилди.
1 февраль куни АҚШнинг Филадельфия шаҳрида авиаҳалокат юз берди: тез тиббий ёрдам самолёти турар жой ҳудудига қулаб тушди, уйлар ва автомобилларга зарар етди.
7 февраль куни бортида 10 киши бўлган самолёт Аляскада ғойиб бўлди
11 февралда эса Аризонадаги аэропортда иккита самолёт тўқнашиб кетди. Фавқулодда вазият оқибатида бир киши ҳалок бўлди, яна уч киши жароҳат олди.
12 февралда АҚШ ҳарбий-денгиз кучларининг самолёти Сан Диэго кўрфазига қулаб тушди. Авиаҳалокат Норт Айленд ҳарбий авиабазаси яқинида юз берган. Самолёт бортида икки киши бўлган. Уларни балиқ овлаш кемаси қутқариб қолган.
19 февраль АҚШнинг Аризона штати осмонида 19 февраль куни кичик самолётлар тўқнашди, оқибатда икки киши ҳалок бўлди. Ҳар бир самолёт бортида иккитадан одам бўлган. Тўқнашув Тусон шаҳри яқинида содир бўлган. Тўқнашувдан сўнг Cessna 172 самолёти хавфсиз қўнишга муваффақ бўлган. Бироқ Lancair 360 МК II учиш-қўниш йўлаги яқинида ерга қулаб, ёниб кетган.
25 февраль Американинг Southwest Airlines авиакомпаниясининг йўловчи самолёти Чикагодаги Мидуэй халқаро аэропортига қўниш чоғида хусусий самолёт билан тўқнашишига бир бахя қолди. Йўловчи самолёти сўнгги дақиқада ҳавога кўтарилишга мажбур бўлган.
Изоҳ (0)