Жанубий Кореянинг Муан аэропортида ҳалокатга учраган Jeju Air самолётининг иккала регистраторида ҳам парвознинг сўнгги дақиқалари қайд этилмаган. Корея транспорт вазирлигининг маълум қилишича, қора қутилар ҳалокатга тўрт дақиқа қолганда ёзиб олишни тўхтатган, деб хабар берди Yonhap.
Самолёт эрталаб соат 9:03 да ҳалокатга учради, иккита регистратор 8:59 да маълумотларни ёзиб олишни тўхтатган. Парвоз ҳақидаги сўнгги дақиқаларнинг йўқлиги ҳалокатни текширишни қийинлаштиради. Бироқ агентлик қайд этганидек, ёзувлар терговчилар учун ягона манба эмас. “Текширув турли ахборот манбалари, жумладан, ҳаво ҳаракатини бошқариш ёзувлари, ҳалокат видеолари ва воқеа жойидаги қолдиқлар таҳлилини ўз ичига олади”, дея тергов гуруҳи сўзларидан иқтибос келтирган Yonhap агентлиги.
Айни пайтда Вашингтонда қора қутилар таҳлил қилинмоқда. Yonhap агентлиги хабарига кўра, терговни давом эттириш учун ёзиб олиш ускуналари душанба куни Кореяга қайтарилади.
29 декабрь, якшанба куни маҳаллий вақт билан соат 9:07 да Jeju Air авиакомпаниясининг Boeing 737-800 йўловчи самолёти Жанубий Кореяда ҳалокатга учради. Таиланднинг Бангкок шаҳридан Жанубий Кореянинг Муан шаҳрига учаётган самолёт қўниш вақтида учиш-қўниш йўлагидан чиқиб кетган ва панжарага урилган, шундан сўнг у икки қисмга бўлинган ва ёниб кетган, 177 нафардан ортиқ одам ҳалок бўлган.
Сўнгги бир ой ичидаги самолётлар билан боғлиқ ҳодисалар
25 декабрь куни Боку—Грозний маршрути бўйича учган самолёт Қозоғистоннинг Оқтов шаҳрида қулаган, оқибатда 38 нафар одам ҳалок бўлганди.
28 декабрь куни Канаданинг Галифакс аэропортида самолёт қўниш чоғида ёниб кетгани хабар қилинган. Йўловчиларнинг сўзларига кўра, самолёт шассисининг ғилдиракларидан бири ишламай қолган. Галифакс аэропорти самолёт бортидаги барча йўловчилар ва экипаж аъзолари эвакуация қилинганини хабар берди.
29 декабрь куни Бирлашган Араб Амирликларида Jazirah Aviation Club авиакомпаниясига тегишли енгил моторли самолёт денгизга қулаб тушди. Маълум қилинишича, авиаҳалокат оқибатида учувчи ва ҳамроҳи ҳалок бўлган.
4 январь куни Airbus А321 йўловчи самолёти Мисрнинг Шарм-аш-Шайх шаҳридаги аэропортга фавқулодда қўнишга мажбур бўлган эди.
Изоҳ (0)