Американинг United Airlines авиакомпаниясининг Лос Анжелесдан Шанхайга учаётган самолёти учувчилардан бири паспортини унутиб қолдиргани сабабли орқага қайтишига тўғри келди. Бу ҳақда компания матбуот хизматига таяниб, CNN хабар берди.
Маълум қилинишича, самолёт бортида 257 нафар йўловчи ва 13 нафар экипаж аъзоси бўлган. Учоқ маҳаллий вақт билан соат 14:00 да ҳавога кўтарилган. Самолёт икки соатлик парвоздан сўнг ортга қайтиб, Сан Францискога йўл олган ва соат 17:00 атрофида қўнган.
Учувчининг ёнида паспорти йўқ эди. Мижозларимизни ўша куни кечқурун манзилга етказиш учун янги экипаж ташкил қилдик. Уларга овқатланиш ва компенсация учун ваучерлар тақдим этилди, дейилади авиакомпания баёнотида.
Тўрт соатдан кейин Сан Францискодан Шанхайга янги экипаж парвоз қилган ва манзилга тахминан олти соат кечикиб қўнган.
АҚШда самолётлар иштирокидаги сўнгги авиаҳодисалар:
25 январь Аляска ярим оролида АҚШнинг F-35А қирувчи самолёти қулаб тушди. Учувчи катапульта қилишга улгурди ва тирик қолди.
30 январь куни эрталаб American Airlines йўловчи самолёти Вашингтон аэропорти яқинида ҳарбий вертолёт билан тўқнашдин, сўнгра Потомак дарёсига қулади. Оқибатда ҳеч ким омон қолмади, 5 февраль куни авиаҳалокатда ҳалок бўлган барча 67 кишининг жасади Вашингтондаги дарёдан олиб чиқилди.
1 февраль куни АҚШнинг Филаделфия шаҳрида авиаҳалокат юз берди: тез тиббий ёрдам самолёти турар жой ҳудудига қулаб тушди, уйлар ва автомобилларга зарар етди.
7 февраль куни бортида 10 киши бўлган самолёт Аляскада ғойиб бўлди.
11 февралда эса Аризонадаги аэропортда иккита самолёт тўқнашиб кетди. Фавқулодда вазият оқибатида бир киши ҳалок бўлди, яна уч киши жароҳат олди.
12 февралда АҚШ ҳарбий-денгиз кучларининг самолёти Сан Диэго кўрфазига қулаб тушди. Авиаҳалокат Норт-Айленд ҳарбий авиабазаси яқинида юз берган. Самолёт бортида икки киши бўлган. Уларни балиқ овлаш кемаси қутқариб қолган.
19 февраль АҚШнинг Аризона штати осмонида 19 февраль куни кичик самолётлар тўқнашди, оқибатда икки киши ҳалок бўлди. Ҳар бир самолёт бортида иккитадан одам бўлган. Тўқнашув Тусон шаҳри яқинида содир бўлган. Тўқнашувдан сўнг Cessna 172 самолёти хавфсиз қўнишга муваффақ бўлган. Бироқ Lancair 360 МK II учиш-қўниш йўлаги яқинида ерга қулаб, ёниб кетган.
25 февраль Американинг Southwest Airlines авиакомпаниясининг йўловчи самолёти Чикагодаги Мидуэй халқаро аэропортига қўниш чоғида хусусий самолёт билан тўқнашишига бир бахя қолди. Йўловчи самолёти сўнгги дақиқада ҳавога кўтарилишга мажбур бўлган.
Изоҳ (0)