Қозоғистонда қулаган Embraer 190 самолётининг ҳалокатга учраши бўйича якуний ҳисобот 2025 йил охиригача тақдим этилади. Бу ҳақда Қозоғистон транспорт вазири ўринбосари Талгат Ластаев маълум қилди.
Халқаро фуқаро авиацияси ташкилоти томонидан тавсия этилган амалиёт талаблари ва стандартларига кўра, текширув бир йил давом этади. Шу сабабли 2025 йил декабрь ойигача тергов бўйича якуний ҳисобот тайёрланиб бўлади, деди Ластаев.
Транспорт вазири ўринбосари ҳалокат бўйича жиноий тергов жараёнига изоҳ бера олмади.
Жиноятни тергов қилиш — бу энди прокуратура органларининг ваколати. Бу масала билан бевосита шуғулланадиган тезкор-тергов гуруҳ бор, деди у.
Оқтовда самолёт ҳалокати: нима бўлганди?
2024 йил 25 декабрь куни Оқтов аэропортидан уч километр узоқликда Озарбайжоннинг Azerbaijan Airlines (AZAL) авиакомпаниясининг Embraer самолёти иштирокида фожиали авиаҳалокат юз берди. Боку—Грозний рейсини амалга ошираётган самолёт фавқулодда қўнишга уриниш чоғида ҳалокатга учради. Бортда 62 нафар йўловчи ва 5 нафар экипаж аъзоси бўлган.
38 киши ҳалок бўлган, яна 29 киши жароҳатланган. Президент Илҳом Алиевнинг таъкидлашича, лайнер радиоэлектрон кураш воситалари ёрдамида бошқарилмайдиган ҳолатга келтирилган ва кейин Россия ҳудудидан ҳужумга учраган. Учувчилар Россиянинг энг яқин аэропортларидан бирига фавқулодда қўнишни сўрашган, бироқ уларга ҳамма жойда рад жавоби берилган, шундан сўнг самолёт Каспий денгизини кесиб ўтиб, Оқтов шаҳрига қулаган.
Алиев ҳалокат учун жавобгарликни Россияга юклаб айбдорларни жазолашни талаб қилган. У, шунингдек, Москванинг самолётнинг ҳаво ҳужумидан мудофаа тизимидан ўққа тутилиши фактини қушлар билан тўқнашув ва бортдаги газ баллони портлаши ҳақидаги “бемаъни тахминлар ёрдамида яшириш”га уринишларидан ғазабланган.
Изоҳ (0)