6 февраль куни Қутб доирасидан жанубда, Аляскадаги Нортон Саунд кўрфази устидан учиб ўтаётган, бортида ўн киши бўлган самолёт радарлардан ғойиб бўлди. Қутқарувчилар тун ярмигача қидирув ишларини давом эттирган.
Аляска жамоат хавфсизлиги департаментининг маълум қилишича, Bering Air авиакомпаниясига тегишли самолёт Уналаклитдан Номга йўл олган. Бортда тўққиз нафар йўловчи ва учувчи бўлган. Ҳозирда масъул идоралар самолётнинг сўнгги маълум координаталарини аниқлашга уринмоқда.
Уналаклит — Алясканинг ғарбий қисмидаги аҳоли пункти бўлиб, у Номдан 240 километр жануби-шарқда ва Анкориждан 640 километр шимоли-ғарбда жойлашган. Бу ерда тахминан 690 киши истиқомат қилади.
Bering Air авиакомпаниясининг эксплуатация бўйича директори Девид Олсоннинг айтишича, Cessna Caravan самолёти Уналаклитдан соат 14:37 да учган ва бир соатдан камроқ вақт ўтгач у билан алоқа узилган. АҚШ қирғоқ қўриқлаш хизмати маълумотларига кўра, самолёт қирғоқдан 19 километр узоқликда бўлган.
Bering Air Алясканинг ғарбий қисмидаги 32 та аҳоли пунктига Ном, Козебу ва Уналаклитдаги марказларидан хизмат кўрсатади. Кўпчилик йўналишларга душанбадан шанбагача кунига икки марта мунтазам рейслар амалга оширилади.
Номнинг ўт ўчириш хизмати ижтимоий тармоқларда хабар беришича, қуруқликдаги гуруҳлар Ном шаҳридан Топкоккача бўлган қирғоқ бўйлаб қидирув ишларини олиб бормоқда.
Об-ҳаво шароити ва кўришнинг ёмонлиги сабабли ҳаводан қидирув ишларини олиб бориш имконияти чекланган, дейилади хабарда.
Аҳолига об-ҳаво шароити жуда хавфли бўлгани учун мустақил қидирув гуруҳлари тузмаслик тавсия этилди. АҚШ қирғоқ қўриқлаш хизмати самолёти экипажи йўқолган кеманинг сўнгги маълум координаталари атрофида қидирув ишларини олиб бориши кутилмоқда.
Миллий метеорология хизмати маълумотларига кўра, учиш вақтида Уналаклитда ҳарорат -8,3 даража совуқ бўлган. Кучсиз қор ёғиб, туман кузатилган.
Самолёт бортида бўлганларнинг исмлари ҳозирча ошкор этилмаяпти.
Бу АҚШда сўнгги кунларда содир бўлган учинчи йирик авиаҳалокат ҳисобланади. Жорий йилнинг 29 январь куни мамлакат пойтахти яқинида йўловчи самолёти ва ҳарбий вертолёт ҳавода тўқнашиши оқибатида 67 киши ҳалок бўлди. Икки кундан сўнг, 31 январь куни Филаделфияда тиббий транспорт самолёти ҳалокатга учради, оқибатда бортдаги олти киши ва ердаги бир киши ҳалок бўлди.
Изоҳ (0)