Франция шарқидаги Сен-Дизе авиабазаси ҳудудида иккита Алпҳа Жет енгил самолётлари тўқнашиб кетди. Бу ҳақда Ҳаво-космик кучлари баёнотига таяниб, AFP хабар берди.
Ҳодиса 25 март куни “Патрул де Франс” учувчилар гуруҳи билан содир бўлган. Икки ҳужумчи самолётининг тўқнашуви машғулотлар пайтида юз берган, деди Франция қуролли кучлари вазири Себастьян Лекорню. Иккала учувчи ва самолётлардан бирининг йўловчиси катапульта қилишга муваффақ бўлган. Улар енгил жароҳат олган.
Маълум қилинишича, самолётлардан бири ўрмонда, иккинчиси эса маҳаллий цемент заводи ҳудудида қулаган. Гувоҳларнинг сўзларига кўра, корхонада ёнғин келиб чиққан, тез орада у ўчирилган. Ҳозирда авиаҳалокат сабабларини аниқлаш учун тергов ишлари давом этмоқда.
Февраль ойида АҚШда самолётлар тўқнашиши билан боғлиқ иккита ҳодиса кузатилган эди. Улардан бири 11 февраль куни кузатилган, Bombardier Learjet самолёти аэропортга қўнганидан сўнг учиш-қўниш йўлагидан чиқиб кетган.
У хусусий ҳудудда тўхтаб турган Gulfstream 2100 бизнес-жетига бориб урилган. Ҳодиса оқибатида уч киши жароҳат олиб, шифохонага ётқизилган, бир киши эса даволанишдан бош торган. Самолётлардан бирида бир киши қамалиб қолган. Ҳодиса оқибатида камида бир киши ҳалок бўлганди.
Иккинчи ҳодиса 19 февралда юз берган. АҚШнинг Аризона штати осмонида кичик самолётлар тўқнашиши оқибатида икки киши ҳалок бўлган. Францияда эса 2024 йилнинг ёзида иккита қирувчи самолёт ҳалокатга учраган эди.
Изоҳ (0)