Январь ойи охирида Вашингтонда йўловчи самолёти билан тўқнашган Black Hawk ҳарбий вертолёти экипажи авиадиспетчернинг лайнер ортидан ўтиш бўйича кўрсатмасини эшитмаган бўлиши мумкин. Бу ҳақда терговчиларга таяниб CBS телеканали хабар берди
Вашингтон шаҳри, Колумбия округи осмонида American Airlines самолёти билан ҳавода тўқнашиб, Потомак дарёсига қулаб тушган Black Hawk ҳарбий вертолёти экипажи авиадиспетчернинг самолёт ортидан ўтиш ҳақидаги кўрсатмаларини эшитмаган бўлиши мумкин, дейилади хабарда.
Тўқнашувдан 17 сония олдин берилган авиадиспетчернинг кўрсатмаси иккала ҳаво кемаси борт ёзув қурилмаларида ҳам қайд этилган. Телеканал маълумотларига кўра, терговчилар Black Hawk экипажи самолёт ортидан ўтиш буйруғини эшитмаган бўлиши мумкин, деб тахмин қилмоқда, чунки айнан шу пайтда вертолёт экипажи микрофон тугмасини босган.
Вашингтоннинг Роналд Рейган номидаги аэропортида 29 январь куни American Airlines авиакомпаниясининг минтақавий Bombardier CРJ700 йўловчи самолёти қўнишга яқинлашаётганда Sikorsky H-60 (Black Hawk) ҳарбий вертолёти билан тўқнашган эди. Лайнер бортида 60 нафар йўловчи ва тўрт нафар экипаж аъзоси, вертолёт бортида эса уч киши бўлган. Улардан ҳеч бири омон қолмаган. Бу АҚШда сўнгги 15 йил ичидаги энг йирик авиаҳалокат бўлгани айтилмоқда.
The New York Times газетаси АҚШ Фуқаролик авиацияси федерал бошқармасининг дастлабки ҳисоботига асосланиб, тўқнашув пайтида диспетчерлик сменаси тўлиқ бўлмагани, бир мутахассис бир вақтнинг ўзида бир нечта вазифаларни, жумладан, вертолётлар ҳаракатини мувофиқлаштириш ва самолётларни қўндириш ишларини бажарганини аввалроқ хабар қилган эди. АҚШ Фуқаро авиацияси федерал бошқармасининг дастлабки ҳисоботига кўра, навбатчи авиадиспетчер ҳодиса куни одатда икки ходим бажарадиган вазифани ёлғиз ўзи амалга оширган. NYTнинг қўшимча қилишича, йўловчи самолётининг ҳарбий вертолёт билан тўқнашуви вертолёт белгиланган баландликдан юқорироқ парвоз қилгани сабабли юз берган.
Изоҳ (0)