Американинг Southwest Airlines авиакомпаниясининг йўловчи самолёти 25 февраль куни Чикагодаги Мидуэй халқаро аэропортига қўниш чоғида хусусий самолёт билан тўқнашишига бир бахя қолди. Бу ҳақда Fox News телеканали хабар берди.
Southwest авиакомпаниясининг Небраска штати Omaha шаҳридан келган 2504-рейси учиш-қўниш йўлагига чиққан бошқа самолёт билан “эҳтимолий тўқнашув”дан қочиш учун огоҳлантирувчи манёврни амалга оширди, дейилади авиакомпания баёнотида.
Йўловчи самолёти сўнгги дақиқада ҳавога кўтарилишга мажбур бўлган. Чунки учиш-қўниш йўлагига чиқиб қолган бизнес-жет унинг йўлини тўсиб қўйган. Шундан сўнг йўловчи самолёти эсон-омон қўнишга муваффақ бўлган. Ҳозирда АҚШ Фуқаролик авиацияси федерал бошқармаси ҳодиса юзасидан тергов олиб бормоқда.
АҚШда юз берган сўнгги авиаҳалокатлар:
25 январь Аляска ярим оролида АҚШнинг F-35А қирувчи самолёти қулаб тушди. Учувчи катапульта қилишга улгурди ва тирик қолди.
30 январь куни эрталаб American Airlines йўловчи самолёти Вашингтон аэропорти яқинида ҳарбий вертолёт билан тўқнашдин, сўнгра Потомак дарёсига қулади. Оқибатда ҳеч ким омон қолмади, 5 февраль куни авиаҳалокатда ҳалок бўлган барча 67 кишининг жасади Вашингтондаги дарёдан олиб чиқилди.
1 февраль куни АҚШнинг Филадельфия шаҳрида авиаҳалокат юз берди: тез тиббий ёрдам самолёти турар жой ҳудудига қулаб тушди, уйлар ва автомобилларга зарар етди.
7 февраль куни бортида 10 киши бўлган самолёт Аляскада ғойиб бўлди.
11 февралда эса Аризонадаги аэропортда иккита самолёт тўқнашиб кетди. Фавқулодда вазият оқибатида бир киши ҳалок бўлди, яна уч киши жароҳат олди.
12 февралда АҚШ ҳарбий-денгиз кучларининг самолёти Сан-Диего кўрфазига қулаб тушди. Авиаҳалокат Норт-Айленд ҳарбий авиабазаси яқинида юз берган. Самолёт бортида икки киши бўлган. Уларни балиқ овлаш кемаси қутқариб қолган.
19 февраль АҚШнинг Аризона штати осмонида 19 февраль куни кичик самолётлар тўқнашди, оқибатда икки киши ҳалок бўлди. Ҳар бир самолёт бортида иккитадан одам бўлган. Тўқнашув Тусон шаҳри яқинида содир бўлган. Тўқнашувдан сўнг Cessna 172 самолёти хавфсиз қўнишга муваффақ бўлган. Бироқ Lancair 360 МК II учиш-қўниш йўлаги яқинида ерга қулаб, ёниб кетган.
Изоҳ (0)