Вашингтондаги Потомак дарёси устида ҳалокатга учраган самолёт ва вертолётнинг кузатув камерадан олинган видеоси CNN телеканалига сиздирилгани учун Вашингтон аэропортлари бошқармасининг икки ходими ҳибсга олинди. Бу ҳақида АBC телеканали хабар бермоқда.
“Вашингтондаги аэропортнинг икки нафар ходими самолёт ва вертолётнинг тўқнашуви акс этган видеони CNN телеканалига тақдим этгани учун ҳибсга олинди”, дейилади телеканал хабарида.
Телеканал маълумотларига кўра, улар аэропорт кузатув камераларидаги видеоёзувларни рухсатсиз кўчириб олишда айбланган.
30 январь куни Вашингтондаги Роналд Рейган аэропортида American Airlines Bombardier CРJ700 минтақавий йўловчи самолёти қўниш вақтида Sikorsky H-60 (Black Hawk) ҳарбий вертолёти билан тўқнашиб кетган эди.
Лайнер бортида 60 нафар йўловчи ва тўрт нафар экипаж аъзоси, вертолёт бортида эса уч киши бўлган. Бу АҚШда рўй берган сўнгги 15 йилдаги энг йирик авиаҳалокат бўлди.
АҚШ президенти Дональд Трамп самолёт ҳалокатидан омон қолганлар йўқлигини айтди. Фуқаролик лайнери йўловчилари орасида АҚШнинг фигурали учиш жамоаси аъзолари ҳам бўлган.
Президент Шавкат Мирзиёев Вашингтон шаҳридаги Роналд Рейган номидаги аэропорт ҳудудида юз берган фожиали авиаҳалокат оқибатида кўплаб инсонлар ҳалок бўлгани муносабати билан Америка Қўшма Штатлари президенти Дональд Трампга таъзия мактуби йўллади.
Изоҳ (0)