Канаданинг Торонто халқаро аэропортига қўниш чоғида Bombardier SRJ900LR самолёти бортида бўлган йўловчиларга 30 минг доллар (28 760 евро) миқдорида товон пули таклиф қилинди.
Лайнер 17 февраль куни Торонтодаги Пирсон халқаро аэропортига фавқулодда қўнишни амалга оширган, у қўниш пайтида ёниб, ағдарилиб кетган.
4819 рейсининг 76 нафар йўловчиси ва тўрт нафар экипаж аъзосидан ҳеч бири ҳалок бўлмаган бўлса-да, уларнинг барчасига товон пули таклиф қилинган. Delta Airlines вакилининг таъкидлашича, молиявий таклиф “ҳеч қандай шартлар билан боғлиқ эмас”. Бу эса йўловчилар авиакомпанияни судга бериши мумкинлигини англатади.
Агар барча йўловчилар тўловга рози бўлса, авиакомпания деярли 2,3 миллион доллар сарфлашига тўғри келади.
Ушбу авиаҳалокат оқибатида тан жароҳати олган 21 нафар йўловчи маҳаллий шифохоналарга етказилган, улардан 20 нафарига жавоб берилган.
Гувоҳларнинг сўзларига кўра, самолёт шу қадар қаттиқ қўнганки, унинг ўнг қаноти ва думи узилиб кетган. У ёнган, шундан сўнг учиш-қўниш йўлагида ағдарилиб кетган. Яна бир гувоҳга кўра, у бортда газ ҳидини сезган, кабина ойналаридан авиация ёнилғиси сизаётганини кўрган ва иложи борича тезроқ чиқиб кетишга уринган.
Самолёт ҳалокатига нима сабаб бўлган?
Ҳозирча ҳалокат сабаби аниқ эмас. Авиация мутахассисларининг фикрига кўра, эҳтимолий омиллар орасида: ердаги шароитлар, учувчининг қўнишдан олдинги ҳаракатлари ва шасси билан юзага келиши мумкин бўлган муаммолар мавжуд. Текширув АҚШ Миллий транспорт хавфсизлиги кенгаши кўмагида Канада транспорт хавфсизлиги кенгаши томонидан олиб борилмоқда.
Аниқланишича, қўниш пайтида минора ва учувчи ўртасидаги алоқа нормал бўлган. Delta рейсига тахминан соат 14:10 да қўнишга рухсат берилган. Аудиоёзувларга кўра, диспетчерлик минораси учувчиларни яқинлашишда “нотекис ҳаво оқими” ҳақида огоҳлантирган.
Об-ҳаво қандай бўлган?
Канада Метеорология хизмати маълумотларига кўра, ҳалокат пайтида Пирсон аэропортида қор ёғиб, соатига 32 миля (51 км/соат) тезликда шамол эсган. Ҳаво ҳарорати Фаренгейт бўйича 16,5 даража атрофида (Цельсий бўйича минус 8,6 даража)ни ташкил этган.
Терговчилар самолёт қолдиқлари ва учиш-қўниш йўлагини ўрганмоқда, шунингдек, учувчилар кабинасидан самолётнинг парвоз маълумотларини қайд этувчи ёзув қурилмалари ва регистраторлар лабораторияга жўнатилган.
Изоҳ (0)