Озарбайжон ўзининг Embraer Э190 самолёти ҳалокати учун Россия билан судлашади, деб хабар бермоқда Azeri-Press. Нашр маълумотларига кўра, ҳозирда далиллар базаси шакллантирилиб, халқаро судга мурожаат қилишга тайёргарлик кўрилмоқда.
Озарбайжоннинг шартлари ва талаблари аниқ, улар энг юқори даражада айтиб ўтилган. Москва ўз айбини очиқчасига тан олиши ва жавобгарликни зиммасига олиши керак. Акс ҳолда, Боку кейинги қадамларга тайёр, дея ёзади агентлик.
Аниқланишича, Озарбайжон ҳукумати Қозоғистон Транспорт вазирлигининг 25 декабрь куни Оқтовда Azerbaijan Airlines (AZAL) самолёти ҳалокатга учрагани ҳақидаги дастлабки ҳисоботи эълон қилинганидан кейин ҳам Россия томонининг ҳодисага нохолис муносабат кўрсатишда давом этаётганидан ғазабланган.
Уларнинг фикрича, бунга Росавиациянинг “ҳужжатда воқеа сабаблари ҳақида хулосалар йўқ” мазмунидаги баёноти гувоҳлик беради. Хусусан, идора самолётга қушлар урилгани ва бортдаги газ баллони портлагани ҳақидаги тахминни диспетчерларга айнан экипаж айтганини, Россия таклиф қилган Маҳачқалъа ва Минералние Води аэропортларига қарамай, қўниш учун Оқтовга учишга қарор қилганини таъкидлаган. Бундан ташқари, Росавиация Москва кемага зарар етказган бегона жиҳозларни ўз экспертизаси учун олмаганини қайд этган. Шу билан бирга, идора баёнотида ҳисоботдаги бошқа муҳим тафсилотлар тушириб қолдирилган. Масалан, Грозний аэропорти диспетчери самолёт шикастланганидан кейинги режа доирасида ҳаво майдони ёпилганини маълум қилган. Шунингдек, Росавиация ҳисоботда қуш зарбаси ва кислород баллони портлаши аломатлари қайд этилмаганини айтмаган.
APАънинг ёзишича, Озарбайжон Москва масъулиятни экипажга юклаб, ишни юмшатмоқчи деб ҳисобламоқда.
Ҳозирда Россия расмийлари AZAL самолётига зарба берилганда Чеченистон Украина дронлари ҳужумини қайтарганига урғу бермоқда. Бироқ Озарбайжон лайнер Россиянинг Панцирь-С ҳаво мудофаа тизимидан ўққа тутилганини даъво қилмоқда. Республика ҳукуматидаги манбанинг Reuters агентлигига маълум қилишича, улар самолётдан олиб чиқилган ва халқаро экспертиза давомида аниқланган тегишли ракета бўлагига эга. Бундан ташқари, Грознийдаги Хонқалъада жойлашган ҳарбий қисм ҳудудидан ҳам ўт очилгани ҳақида маълумотлар бор.
AZAL авиакомпаниясининг Бокудан Грознийга учаётган Embraer E190 самолёти 25 декабрь куни Оқтов яқинида ҳалокатга учради. 38 киши ҳалок бўлди, яна 29 киши жароҳатланди. Алиевнинг таъкидлашича, лайнер радиоэлектрон кураш воситалари ёрдамида бошқарилмайдиган ҳолатга келтирилган ва кейин Россия ҳудудидан ҳужумга учраган. Учувчилар Россиянинг энг яқин аэропортларидан бирига фавқулодда қўнишни сўрашган, бироқ уларга ҳамма жойда рад жавоби берилган, шундан сўнг самолёт Каспий денгизини кесиб ўтиб, Оқтов шаҳрига қулаган. Алиев ҳалокат учун жавобгарликни Россияга юклаб айбдорларни жазолашни талаб қилди. У, шунингдек, Москванинг самолётнинг ҳаво ҳужумидан мудофаа тизимидан ўққа тутилиши фактини қушлар билан тўқнашув ва бортдаги газ баллони портлаши ҳақидаги “бемаъни тахминлар ёрдамида яшириш”га уринишларидан ғазабланган.
Изоҳ (0)