АҚШда JetBlue самолётининг шасси қисмида икки кишининг жасади топилди. Жасадлар Флорида штатидаги Форт-Лодердейл халқаро аэропортида парвоздан кейинги хавфсизлик текшируви вақтида аниқланган.
Бу ҳақда JetBlue авиакомпанияси баёнотида маълум қилинди.
“Ҳозирча қурбонларнинг шахси ва улар самолётга қандай кириб олишгани аниқланмаган”, дейилади компания баёнотида.
JetBlue воқеани "даҳшатли вазият" деб атади ва барча ҳолатларга ойдинлик киритиш учун расмийлар билан ҳамкорлик қилишга тайёрлигини таъкидлади.
Newsweek журналининг аниқлик киритишича, ҳодиса Нью Йоркдаги Жон Кеннеди номидаги аэропортдан учаётган самолёт билан содир бўлган.
Бугун 7 январь куни Санкт-Петербургдан Самарқандга учган самолёт Москвадаги Внуково аэропортига фавқулодда қўнишни амалга оширгани хабар берилганди.
Маълум қилинишича, самолёт Внуковога фавқулодда қўнаётганда йўловчилар ва экипаж аъзолари жабрланмаган.
Сўнгги бир ой ичидаги самолётлар билан боғлиқ ҳодисалар
25 декабрь куни Боку—Грозний маршрути бўйича учган самолёт Қозоғистоннинг Оқтов шаҳрида қулаган, оқибатда 38 нафар одам ҳалок бўлганди.
28 декабрь куни Канаданинг Галифакс аэропортида самолёт қўниш чоғида ёниб кетгани хабар қилинган. Йўловчиларнинг сўзларига кўра, самолёт шассисининг ғилдиракларидан бири ишламай қолган. Галифакс аэропорти самолёт бортидаги барча йўловчилар ва экипаж аъзолари эвакуация қилинганини хабар берди.
29 декабрь, якшанба куни маҳаллий вақт билан соат 9:07 да Jeju Air авиакомпаниясининг Boeing 737-800 йўловчи самолёти Жанубий Кореяда ҳалокатга учради. Таиланднинг Бангкок шаҳридан Жанубий Кореянинг Муан шаҳрига учаётган самолёт қўниш вақтида учиш-қўниш йўлагидан чиқиб кетган ва панжарага урилган, шундан сўнг у икки қисмга бўлинган ва ёниб кетган, 177 нафардан ортиқ одам ҳалок бўлган.
29 декабрь куни Бирлашган Араб Амирликларида Jazirah Aviation Club авиакомпаниясига тегишли енгил моторли самолёт денгизга қулаб тушди. Маълум қилинишича, авиаҳалокат оқибатида учувчи ва ҳамроҳи ҳалок бўлган.
4 январь куни Airbus А321 йўловчи самолёти Мисрнинг Шарм-аш-Шайх шаҳридаги аэропортга фавқулодда қўнишга мажбур бўлган эди.
Изоҳ (0)