Президент Шавкат Мирзиёев Вашингтон шаҳридаги Роналд Рейган номидаги аэропорт ҳудудида юз берган фожиали авиаҳалокат оқибатида кўплаб инсонлар ҳалок бўлгани муносабати билан Америка Қўшма Штатлари президенти Дональд Трампга таъзия мактуби йўллади. Бу ҳақда Президент матбуот хизмати хабар берди.
Давлат раҳбари марҳумларнинг оила аъзолари ва яқинларига, бутун Америка халқига чуқур ҳамдардлик изҳор этди.
АҚШ Фуқаро авиацияси федерал бошқармаси (FAA) аввалроқ Вашингтонда Sikorsky H-60 (Black Hawk) ҳарбий вертолёти ва йўловчи самолёти тўқнашгани ҳақида хабар берган эди.
Самолёт American Airlines авиакомпаниясининг 5342-рейсини Канзас штатининг Уичита шаҳридан Вашингтонга амалга оширган. У Bombardier CRJ700 реактив самолёти ҳисобланади. Бортда 60 нафар йўловчи, 4 нафар экипаж аъзоси бўлгани айтилмоқда. Транспортда хавфсизлик бўйича миллий кенгаш FAA билан ҳамкорликда текширув ўтказмоқда.
Оқ уй матбуот котиби Каролин Левиттнинг таъкидлашича, президент Дональд Трампга ҳодиса ҳақида хабар берилган.
Сўнгги маълумотларга кўра, 30 дан ортиқ одамнинг жасадлари дарёдан олиб чиқилган.
Изоҳ (0)