Мадриднинг “Реал” клуби мураббийлар штаби Испания Кубоги финалида “Барселона” устидан ғалаба қозониш учун ўз стратегиясини ишлаб чиққан. Бу ҳақда Football Эспана нашри хабар берди.
Маълумотларга кўра, “Реал” илк 60 дақиқада рақобатбардош ўйин кўрсата олса, якунда ғалабани қўлга киритишига ишонмоқда. Жамоа мураббийлари “Барселона” футболчилари ўйин сўнгги дақиқаларида жисмоний жиҳатдан қийналишини кузатган.
Шу боисдан, “Реал” ўзининг юқори жисмоний тайёргарлигига таянган ҳолда кубокни қўлга киритишига ишоняпти.
Маълумот ўрнида, ярим финал баҳсларида “Реал” “Реал Сосьедад”ни мағлуб этган бўлса, “Барселона” Мадриднинг бошқа клуби — “Атлетико”дан устун келди. Шу тариқа, мухлислар Испания Кубоги финалида “Эл-Класико”га гувоҳ бўлишади. Ушбу воқеа сўнгги бор 11 йил аввал кузатилган ва унда мадридликлар 2:1 ҳисобида ғалаба қозонган.
“Реал Мадрид” — “Барселона” ўртасидаги ҳал қилувчи баҳс 26 апрель куни бўлиб ўтади.
Изоҳ (0)