Мадриднинг “Реал” клуби ҳужумчиси Килиан Мбаппе Испания чемпионатининг 29-туридаги “Леганес”га қарши ўйинда (3:2) дубль қайд этди. У Мадрид клуби сафида дебют мавсумида 33 та гол уриб, Криштиану Роналду ҳамда Руд ван Нистелройнинг натижасини такрорлади.
Футболчи ушбу натижани қайд этгандан сўнг ўз фикрлари билан ўртоқлашди.
Бу ўзига хос ютуқ. Энг муҳими – жамоа билан эришиладиган натижалар, лекин Криштиану каби кўп гол уриш ҳар доим хурсанд қилади. Уни “Реал” учун қанчалик муҳим футболчи бўлганлигини яхши биламиз. Роналду ушбу жамоа сафида кўп гол урган футболчи сифатида менга кўп маслаҳат беради. Голлар муҳим нарса, аммо биз соврин ютиш учун ўйнаяпмиз, дейди Мбаппе Marca нашрига берган интервьюсида.
Маълумот учун, бу борада рекордчи эса Иван Саморано ҳисобланади. Чилилик футболчи “Реал” сафидаги дебют мавсумида 37 та гол уришни уддалаган. Мавсум якунига қадар 8 тур қолганини ҳисобга олсак, Мбаппе ушбу натижани ҳам янгилаши мумкин.
Франциялик ҳужумчи 2024 йил ёзида “Реал” сафига қўшилган. Бунгача у “ПСЖ” ва “Монако” клубларида тўп сурган. Унинг мадридликлар билан шартнома 2029 йилга қадар амал қилади.
Изоҳ (0)