Футбол бўйича Чемпионлар Лигаси ярим финал жавоб ўйинида “Манчестер Сити” ва “Реал” жамоалари 17 май, чоршанба куни ўзаро тўқнаш келади. Қарама-қаршилик ғолиби 10 июнь куни Истанбулдаги финалда “Интер” билан ўйнайди.
Ярим финалнинг дастлабки баҳси “Сантьяго Бернабеу”да бўлиб ўтган ва унда 1:1 ҳисоби қайд этилган. Мадридликлар сафида Винисиус Жуниор гол урган бўлса, “шаҳарликлар”нинг голига Кевин де Брюйне муаллиф бўлган.
Жамоалар ҳолати
АПЛнинг сўнгги турида “Эвертон” устидан қозонилган ғалабадан сўнг “Манчестер Сити” требл сари яна бир қадам ташлади. “Арсенал” шу турда “Брайтон”га имкониятни бой бериб қўйди ва энди Пеп Гвардиола жамоаси қолган 3 та турдан фақат биттасида ғалаба қозонса, Англия чемпионига айланади. Англия Кубоги финалида “Манчестер Юнайтед”га қарши баҳс олиб боради. Чемпионлар Лигаси ярим финал жавоб ўйини эса “шаҳарликлар” учун янги тарих ёзишга ажойиб имконият.
“Реал” эса лигада “Хетафе”ни Асенсионинг голи эвазига мағлуб этди. Шу турнинг ўзида принципиал рақиби “Барселона” Испания чемпионлигини нишонлади. Мадрид клубида требл қилиш учун имконият энди йўқ. Лекин улар учун “ўзиники” бўлиб қолган “шалпангқулоқ”ни қўлга киритиш асосий вазифалардан бири бўлиб қолаверади.
Жамоаларнинг сўнгги ўйинлари
“Манчестер Сити”
- 14.05. “Эвертон” 3:0 (АПЛ)
- 09.05 “Реал” 1:1 (ЕЧЛ)
- 06.05. “Лидс” 2:1 (АПЛ)
- 03.05. “Вест Ҳэм” 3:0 (АПЛ)
- 30.04. “Фулҳэм” 2:1 (АПЛ)
“Реал”
- 13.05. “Хетафе” 1:0 (Ла Лига)
- 09.05. “Манчестер Сити” 1:1 (ЕЧЛ)
- 06.05. “Осасуна” 2:1 (Испания Кубоги)
- 02.05. “Реал Сосьедад” 0:2 (Ла Лига)
- 29.04. “Алмерия” 4:2 (Ла Лига)
Статистика
- “Манчестер Сити” Чемпионлар Лигаси доирасида уй ўйинларида 25 баҳсдан буён мағлуб бўлмаяпти (23 та ғалаба ва 2 та дуранг). Сўнгги бор 2018 йил сентябрь ойида “Лион” “Этиҳад”да ғалаба қозонишга муваффақ бўлган.
- “Реал” “Манчестер Сити” майдонида 4 ўйиндан буён ғалаба қозона олмаяпти (2 та дуранг ва 2 та мағлубият).
- “Манчестер Сити” февраль ойидан буён барча мусобақаларда мағлубиятга учрамаяпти (18 та ғалаба ва 4 та дуранг).
- “Манчестер Сити” 2023 йил ўз майдонидаги барча 15 та ўйинда ғалаба қозонган. Тўплар нисбати — 52:7.
- “Реал” ЕЧЛдаги сўнгги 7 та плей-офф ўйинларида мағлуб бўлмаяпти (6 та ғалаба ва битта дуранг).
- “Манчестер Сити” сўнгги етти йил ичида “Реал”га икки марта ЕЧЛ ярим финалини бой берган.
- “Реал” меҳмондаги сўнгги 6 ўйиннинг учтасида мағлубиятга учради: “Барселона” (1:2), “Жирона” (2:4) ва “Реал Сосьедад” (0:2).
- “Манчестер Сити” Чемпионлар Лигасининг 2022/23 йилги мавсумидаги барча уй учрашувларида ғалаба қозонди. Тўплар нисбати — 20:2.
Мураббийларнинг ўйин олдидан фикрлари
Карло Анчелотти (“Реал”)
Вазифа ҳар доимгидек, жамоа билан максимал натижаларга эришиш. Менда ажойиб режа бор, агар ютқазадиган бўлсак, мен таркиб танлашда адашган бўламан.
“Реал”нинг ЕЧЛдаги муваффақият сири? Буни тушунтириш қийин. Дастлабки 5 та совриндан кейин бу мусобақа “Реал” учун доим муҳим аҳамият касб этган. Клуб ди Стефано, Хенто ва Амансиоларнинг тарихини сақлаб қолиши керак.
Пеп Гвардиола (“Манчестер Сити”)
Ҳужумда яхшироқ ҳаракат қилишимиз учун баъзи бир ўзгаришларни амалга ошираман. Хавотирга ҳожат йўқ, бу ўзгаришлар аввалгиларидан унчалик фарқ қилмайди.
Барчасини ўзингиз кўриб оласиз. Бошқа нарсаларни гапира олмайман, чунки Карло Анчелотти буни эшитиб қолиши мумкин.
“Манчестер Сити” ва “Реал” ўртасидаги баҳс Ўзбекистон вақти билан 17 майдан 18 майга ўтар кечаси 00:00 да старт олади.
Изоҳ (0)