Мадриднинг “Реал” клуби ҳужумчиси Эндрик Испания Кубоги ярим финалида “Реал Сосьедад” дарвозасига гол уриб, жорий мавсум ушбу турнирдаги голлари сонини бештага етказди. Шу тариқа, бразилиялик футболчи “қироллик клуби” таркибида 2012/13 йилги мавсумдан бери мазкур мусобақада камида бешта гол урган илк футболчига айланди.
Манбага кўра, Эндрик бу орқали “Реал”нинг собиқ ҳужумчиси Криштиану Роналдудан кейин бир мавсумда Испания Кубогида 5 та гол урган илк футболчига айланган. 2012/13 йилда португалиялик футболчи ушбу мусобақада етти бор рақиб дарвозасини ишғол қилган.
18 ёшли Эндрик 2024 йилнинг июль ойида “Реал” сафига қўшилган эди. Унга қадар футболчи “Палмейрас” сафида ўйнаган. Эндрик Европадаги илк мавсумида барча мусобақаларда 28 учрашувда майдонга тушиб, 6 та гол уришга муваффақ бўлди.
Маълумот учун, кеча, 1 апрель куни Испания Кубоги ярим финал жавоб баҳсида “Реал Мадрид” — “Реал Сосьедад” билан тўқнаш келди (4:4). Икки ўйин натижасига кўра, мадридликлар 5:4 ҳисобида ғалаба қозониб, финал йўлланмасига эга чиқди. Иккинчи финалчи номи бугун, 2 апрель куни бўладиган “Атлетико” — “Барселона” баҳсида аниқланади.
Изоҳ (0)