Испания Кубоги ярим финал жавоб ўйинида “Барселона” ва “Реал Мадрид” жамоалари тўқнаш келади. Мадридда ўтган дастлабки ўйинда “Барселона” 0:1 ҳисобидаги ғалабани қўлга киритганди. Қуйида “Эл-Класико” тарихидаги энг яхши тўпурарлар ёдга олинади.
Ференс Пушкаш (“Реал Мадрид”) — 14 та гол
“Реал”нинг венгриялик афсонаси класиколар тарихида 14 та гол урган. Уларнинг 9 таси Ла Лига доирасида киритилган бўлса, 3 та тўп Еврокубокларда киритилган. Пушкаш 2 та голини Испания Кубогида урган.
“Реал”га 31 ёшида келган ва ажойиб даврни (1958—1967) ўтказган “Пушечка-Bum” нафақат класиколар, балки “Реал” тарихида ҳам энг яхши тўпурарлардан бири. Пушкаш 242 та гол билан Мадрид тўпурарлари рўйхатида 6-ўринда туради.
Қайд этиш керак, Пушкаш класиколарда ўртача гол уриш бўйича етакчи ҳисобланади — 0,78 (18 ўйинда 14 та гол).
Сесар Родригес (“Барселона”) — 14 та гол
Фаолиятининг қарийб 20 йилини (асосий жамоада: 1939—1955) “кўк-анорранглилар” сафида ўтказган Сесар жамоа сафида 351 та ўйин ўтказган ва уларда 232 та гол урган. Родригес “Реал”га қарши асосий голларини Ла Лигада киритган — 12 та. Испания Кубогида эса икки бор азалий рақиб дарвозасига йўл топган.
Сесар расмий ўйинлардаги голлар бўйича узоқ йиллар давомида “Барселона”нинг энг яхши тўпурари бўлиб турди. Бироқ 2012 йилнинг март ойида Лионель Месси унинг рекордини янгилади.
Фаолиятини якунлагандан кейин бир мавсум каталонга бош мураббий бўлган, бироқ бу борада омади чопмаган.
Франсиско Хенто (“Реал Мадрид”) — 14 та гол
Умрини “Реал”га бағишлаган яна бир футболчи. Пако 1953—1971 йиллар давомида “қаймоқранглилар” шарафини ҳимоя қилган. Хенто бир жамоа сафида Европа Чемпионлар Кубогини 6 марта қўлга киритган тарихдаги ягона футболчи ҳисобланади.
“Эл-Класико”ларда Хенто Ла Лига доирасида 10 та, Испания Кубоги ва Еврокубокларда 2 тадан тўп киритган.
“Реал” афсонаси 2022 йилнинг 18 январь куни 88 ёшида вафот этди.
Рауль (“Реал Мадрид”) — 15 та гол
Исми “Реал” номи билан ёнма-ён айтиладиган афсоналардан бири. 1994—2010 йиллар давомидаги фаолияти мобайнида Рауль “Мадрид”нинг ҳақиқий рамзига айланди. 550 дан ошиқ ўйин ўтказди ва 220 дан ортиқ гол урди.
“Барселона”га қарши ўйинларда Рауль 15 марта рақиб дарвозасига йўл топган. Улардан 11 таси Примерада, 3 таси Суперкубок ўйинида ва битта Чемпионлар Лигасида.
Рауль ўз вақтида Ди Стефанонинг рекордини янгилаб, “Реал” тарихидаги энг яхши тўпурарга айланганди. Кейинчалик ундан Криштиану Роналду ва Карим Бензема ўзиб кетди.
Алфредо Ди Стефано (“Реал Мадрид”) — 18 та гол
“Реал”нинг афсонавий футболчиларидан бири узоқ йиллар давомида класиколар тарихидаги энг яхши тўпурар мақомини сақлаб турди, “ўзга сайёраликлар” ташрифига қадар. Класиколарда 14 та голни Ла Лигада, 2 тасини Испания Кубоги ва яна иккитасини Еврокубоклар доирасида урган.
Жанубий Америкадаги фаолиятидан кейин Европадаги саргузаштларини “Барселона”да бошлаши кутилган Ди Стефано охир-оқибат “Реал” сафига бориб қўшилганди. Мадриддаги 12 йил давомида “сарғиш сочли мерган” кўп жабҳадаги рақамларни янгилаб юборди.
Криштиану Роналду (“Реал Мадрид”) — 18 та гол
“Реал”нинг энг яхши тўпурари класиколарда ҳам гол уришдан тўхтамаган. Унинг 2011 йил “Барселона”га киритган тўпи Marca томонидан йилнинг энг чиройли голи сифатида эътироф этилганди.
2009—2018 йиллар давомида Мадридда фантастик натижалар кўрсатган Криштиану 450 та голни ўз ҳисобига ёздириб қўйган. “Эл-Класико”ларда Роналду 9 та голини лигада, 5 тасини кубок ўйинларида ва яна 4 тасини Испания Суперкубогида урган.
Лионель Месси (“Барселона”) — 26 та гол
Аргентиналик тирик афсона класиколарда “Реал”ни аяб ўтирмаган. Месси “Реал”га қарши 45 та ўйин ўтказган. 18 та гол Ла Лигада, 6 таси Суперкубокда ва яна 2 та Чемпионлар Лигасида урилган. Бироқ Месси Испания Кубогида Мадрид дарвозасини ишғол қилолмаган.
“Барселона” тарихидаги биринчи рақамли футболчига айланган Месси 2004—2021 йиллар давомида каталонлар сафида қўлга киритиш мумкин бўлган барча совринларга эга чиқди ва 630 та гол урди.
Бонус
Карим Бензема (“Реал Мадрид”) — 13 та гол
Юқоридаги футболчилар натижасини ортда қолдириши мумкин бўлган ўйинчи Бензема бўлиб турибди. Сўнгги йилларда кучли ўйин намойиш қилаётган Карим икки жамоа сафидаги актив футболчилар орасида класиколардаги энг яхши тўпурар бўлиб турибди. У Испания Кубогида каталонларга бир марта гол урган (Ла Лига — 8, Суперкубок — 4) ва бугун ушбу кўрсаткични янгилаш имкониятига эга.
Изоҳ (0)