Футбол бўйича Англия чемпионати 28-турида “Манчестер Сити” сафарда “Ноттингем Форест”га 0:1 ҳисобида ютқазди.
Сўнгги 7 йилда 6 марта Англия чемпиони бўлган “шаҳарликлар” учун бу мавсум омадсиз ўтмоқда. “Сити” кеча, 8 март куни жорий мавсум ички чемпионат доирасидаги 9-мағлубиятини қабул қилди. Шу тариқа, Хосеп Гвардиола ўзининг шахсий антирекордини такрорлади. Худди шундай кўрсаткич клубда 2019—20 йилги мавсумда кузатилган бўлиб, ўшанда улар иккинчи ўринни эгаллаб, чемпион “Ливерпуль”дан 18 очкога ортда қолган эди. Гвардиола “Манчестер Сити” бошқарувига келгач, фақат икки марта чемпион бўла олмаган: 2016—17 йиллардаги дебют мавсумида ҳамда 2019—20 йилги мавсумда улар бош совринга эга чиқмаган.
Шунингдек, кечаги баҳс ушбу мавсум барча мусобақалар доирасидаги манчестерликларнинг 15-мағлубият сифатида қайд этилди ва бу борада ҳам Гвардиола шахсий антирекордини янгилади. Бунгача испаниялик мутахассис бошқарувидаги жамоа ҳеч қачон бир мавсумда 15 марта имкониятни бой бермаган эди.
Ушбу мавсумда “шаҳарликлар” қуйидаги жамоаларга мағлуб бўлди:
- “Тоттенҳэм” (1:2, 0:4)
- “Борнмут” (1:2)
- “Спортинг” (1:4)
- “Брайтон” (1:2)
- “Ливерпуль” (0:2, 0:2)
- “Ювентус” (0:2)
- “Манчестер Юнайтед” (1:2)
- “Астон Вилла” (1:2)
- “ПСЖ” (2:4)
- “Арсенал” (1:5)
- “Реал Мадрид” (2:3, 1:3)
Маълумот учун, жорий мавсум “Сити” 28-турдан кейин 47 очко билан АПЛ турнир жадвалида 4-ўринда бормоқда.
Изоҳ (0)