“Челси” ёзги трансфер бозорида катта харидларни амалга оширишни режалаштирмоқда. Лондон клуби “Реал Мадрид”нинг икки иқтидорли ҳужумчиси — Родриго Гоэс ва Эндрикни ўз сафига қўшиб олиш учун ҳаракат қилиб кўради. Бу ҳақида Тодофичажес нашри хабар берди.
Маълумотларга кўра, “кўклар” икки бразилиялик футболчи учун 180 миллион евро (Родриго учун 120 миллион, Эндрик учун 60 миллион) тўлашга тайёр. Клуб раҳбариятининг фикрича, ушбу трансферлар нафақат “Челси”нинг ҳужум чизиғини кучайтириш, балки Англия Премьер Лигаси ҳамда Европа миқёсида яна рақобатбардош жамоага айланишга хизмат қилади.
Родриго Карло Анчелотти тизимида асосий футболчилардан бири ҳисобланади. У жорий мавсум Чемпионлар Лигасида 10 ўйинда майдонга тушиб, 5 гол ва 2 ассист муаллифига айланди. “Челси” унинг Ла Лига ва Чемпионлар Лигасидаги тажрибасидан фойдаланиб, кўплаб соврин ютишни мақсад қилган.
Эндрик 2024 йилда “Палмейрас”дан “Реал” сафига қўшилди ва ҳали жамоага тўлиқ мослашиб улгурмаган. Лекин у катта салоҳиятга эга футболчи эканлиги лондонликларнинг “шорт листи”дан жой олишга сабаб бўлмоқда.
Бироқ “Реал” бу трансферлар бўйича музокара ўтказишни истамаяпти. Клуб президенти Флорентино Перес Родриго ва Эндрикни узоқ муддатли лойиҳанинг асосий қисми деб билади. Шунингдек, футболчиларнинг ўзи ҳам “Сантяго Бернабеу”да қолишни истаётганини билдирган. Шу сабаб “Челси” нафақат “қироллик клуби” раҳбарияти, балки икки бразилиялик футболчини ишонтиришда ҳам катта тўсиқларга дуч келиши мумкинлиги айтилмоқда.
Изоҳ (0)