Саудия Арабистонининг бир қанча клуби вакиллари “Реал” ҳужумчиси Винисиус Жуниорни ўз сафига қўшиб олиш режасидан қайтмаган. The Telegraph нашрининг хабарига кўра, бразилиялик футболчи Саудия жамоалари учун асосий трансфер мақсадларидан бири бўлиб турибди ва музокаралар аллақачон бошланган.
Винисиус Саудия Арабистони суверен жамғармаси томонидан бошқариладиган клублардан бирига ўтиши мумкин. Булар “Ал-Ҳилол, “Ал-Аҳли”, “Ан-Насср” ва “Ал-Иттиҳод” жамоалари ҳисобланади. Унинг трансфери тахминан 242 миллион еврога баҳоланмоқда. Агар келишув амалга ошса, бу футбол тарихидаги энг қиммат трансферга айланади. Ҳозирги рекорд Неймарга тегишли бўлиб, у 2017 йилда “Барселона”дан “ПСЖ” га 222 миллион еврога трансфер қилинган эди.
Мадрид клуби Винисиусни қўйиб юборишни истамаяпти, лекин футболчининг ўзи розилик берса, битим амалга ошиши мумкин. Сабаби “Реал” раҳбарияти бразилиялик юлдузнинг нархи вақт ўтиши билан пасайиб боришини тушуниб турибди. Унинг “қаймоқранглилар” билан тузилган шартномаси 2027 йилнинг ёзигача мўлжалланган.
Маълумот ўрнида Винисиус жорий мавсум барча мусобақалар доирасида 29 та учрашувда майдонга тушиб, 16 марта рақиблар дарвозасини ишғол қилган ҳамда 8 бор ассист муаллифига айланган.
Изоҳ (0)