“Реал Мадрид” ярим ҳимоячиси Лука Модрич Испания Суперкубоги финалида “Барселона”дан учралган мағлубиятдан сўнг фикрларини билдириб ўтди.
Таъкидлаш лозим, Лука мазкур баҳсдан сўнг интервью берган “Реал”даги ягона футболчи бўлди.
“Асосий рақибингиз икки ўйинда 9 та гол урса, уят. Ўйлайманки, биз жавоб берамиз. Мен бунга аминман. Ўйин бундай бўлади деб ўйламагандик ва мухлисларга ҳам, ўзимизга ҳам ачиняпмиз. Ҳозир бирлашишимиз ва ишлашимиз керак. Ишончим комилки, ушбу мавсум хурсанд бўлиш учун жуда кўп сабаблар бўлади ва ҳали ҳаммаси олдинда.
Бу – футбол, ғалаба ва мағлубият бирга юради. Бу сафар ютқаздик. Мағлубият ҳар доим ёқимсиз, лекин финаллардан биридаги мағлубиятни танлаш керак бўлса, у ҳолда Суперкубок бўла қолсин. “Барселона”ни табриклаш керак, улар яхшироқ эди. Шу холос”, – дейди хорватиялик футболчи.
Аввалроқ “Реал” бош мураббийи Карло Анчелотти “Барселона”га қарши ўйинда жамоа нега мағлубиятга учраганини айтганди.
Изоҳ (0)