“Манчестер Сити” ёзги трансфер ойнасида таркибни янгилаш режасининг бир қисми сифатида Мануэл Аканжини “Реал Мадрид”га таклиф қилган. Бу ҳақида 90мин нашри хабар бермоқда.
Аканжининг шартномаси 2027 йилгача амал қилса-да, “Сити” уни трансферга қўйишга тайёр. Манба хабарига кўра, клуб вакиллари “Реал Мадрид” билан алоқага чиқиб, швейсариялик ҳимоячини таклиф қилган.
Бироқ Мадрид клуби ушбу таклифга унчалик қизиқиш билдиргани йўқ. 30 ёшга яқинлашаётган футболчи “Реал”нинг узоқ муддатли режалари учун мос келмайди. Клуб ёш ва келажаги порлоқ футболчиларни таркибга қўшишга эътибор қаратмоқда. Бундан ташқари, Аканжининг кўп жароҳат олиши ҳам унинг трансферига бўлган шубҳаларни кучайтирган.
Пеп Гвардиола жамоанинг кўплаб тажрибали футболчиларини ёзда сотиб юборишини очиқ айтди. Таркибни янгилаш жараёни аллақачон бошланган бўлиб, қишки трансфер ойнасида марказий ҳимоячилар Абдуқодир Ҳусанов ва Vitoр Рейс каби футболчилар катта сумма эвазига сотиб олинди. Шунингдек, ярим ҳимоячи Нико Гонсалеш ва ҳужумчи Омар Мармуш ҳам таркибга қўшилди. Клуб Кевин Де Брюйне, Эдерсон, Жек Грилиш, Матео Ковачич, Натан Аке ва Мануэл Аканжи каби футболчиларга янги жамоа топиш ҳаракатини бошлаган.
Жорий мавсумда “шаҳарликлар” кутилган натижаларга эриша олмаяпти. Жамоа АПЛ турнир жадвалида бешинчи ўринда бормоқда ва пешқадам “Ливерпуль”дан 22 очко ортда қолмоқда. Шунингдек, Чемпионлар лигаси плей-офф босқичида “Реал”га мағлуб бўлиб, мусобақадан чиқиб кетди.
Изоҳ (0)