Роберто Карлос 49, Рауль эса 44 ёшда. «Реал»нинг 90 йиллардаги юлдузлари ҳозир қаерда ва қандай кўринишга эга? (фото)

Ўтган асрнинг 90 йиллари охирларида Роберто Карлос, Фернандо Йерро, Уго Санчес, Рауль, Мануэль Санчис каби номлар Испания ва Европа майдонларида «Реал»га кўплаб ғалабалар ва совринлар олиб келарди. Орадан ўттиз йил ўтди ва жуда кўп нарсалар ўзгарди. Қуйида «Сантьяго Бернабеу» афсоналари ҳозир қаердалиги ва нима билан шуғулланаётгани ҳақида сўз юритилади, шу билан бирга уларнинг ҳозирги ташқи кўриниши қандай деган саволга ҳам жавоб берилади.

Эмилио Бутрагеньо, 58 ёш

Бутрагеньо «Реал» сафида 12 мавсум ўтказган, мухлислар эса унга «калхат» лақабини берган. Эмилио Испанияда қўлга киритиш мумкин бўлган барча совринларга эга чиққан, аммо фақат бир марта — 1991 йилда Примеранинг энг яхши тўпурари (19 та гол билан) бўлган. Таниқли тўпурар айни дамда «қироллик клуби» бошқарув тизимида фаолият кўрсатади.

Уго Санчес, 63 ёш

Санчес «қироллик клуби»га 27 ёшида «Атлетико»дан кўчиб ўтган ва бунинг учун «Висенте Калдерон»нинг нафратига учраган. Бироқ унинг ўзи бу трансфердан афсусланишига ҳеч қандай асос йўқ. Мадриддаги етти йил давомида мексикалик ҳужумчи 250 дан ортиқ учрашув ўтказиб, 190 та гол уради, беш марта Испания чемпионати тўпурари бўлади ва бир бор Европада «Олтин бутси»ни ўзиники қилади. Санчес Ла Лига тарихидаги энг яхши тўпурарлар орасида кучли тўртликка киради (Месси, Роналду ва Телмо Саррадан кейин). Санчес ҳозир бир-йўла икки давлатда — Мексика ва Испанияда истиқомат қилади ва кўп вақтини оиласига бағишлайди.

Мануэль Санчис, 57 ёш

Санчис Мадрид клуби тарбияланувчиси бўлиб, футболдаги фидойилик тимсоли ҳисобланади. У бутун фаолиятини «Реал»да ўтказган. Мануэль 18 йил давомида 655 та ўйинда қатнашиб, 37 та голни ўз номига ёздириб қўйган. Афсонавий Санчис 13 мавсум давомида «қаймоқранглилар»га сардорлик қилиб, қўлга киритиш мумкин бўлган ҳамма совринларни ютади. Фаолиятини якунлаганидан кейин Санчис футболдан узоқлашди ва камдан-кам ҳолларда омма олдида кўриниш бермоқда.

Фернандо Йерро, 54 ёш

Испания терма жамоасининг бўлажак сардори 1989 йилда «Вальядолид»дан Мадридга кўчиб ўтган. Фернандо «Реал»да Ла Лига тарихидаги энг сермаҳсул ҳимоячилардан бири сифатида шуҳрат қозонди. 15 мавсум ва 587 ўйинда Йерро 124 гол урган. Кучли зарбаси ва иккинчи қаватдаги ажойиб ўйини Фернандога мунтазам равишда ҳужумларга қўшилишга имкон яратади. 1991/92 йилги мавсумда эса 21 та гол билан мавсумни якунлаган, ўшанда у бир ўйинда покер қилишга муваффақ бўлганди. 2018- йилги Жаҳон Чемпионати бошланишига бир кун қолганида кутилмаганда (эҳтимол, ўзи учун ҳам шундайдир) Испания терма жамоасига бош мураббий этиб тайинланади. Ўша вақтда у Испания футбол федерациясида миллий терма жамоа спорт директори лавозимида фаолият олиб борарди. У терма жамоа бошқарувида Хулен Лопетегининг ўрнини эгаллайди. Бироқ Йерро бу курсида бор-йўғи бир ой ишлайди, холос. Мундиалдан сўнг Йерро терма жамоадан кетади. Шундан кейин у ҳали бирор жойда ишлагани йўқ.

Иван Саморано, 55 ёш

Иван Саморано фаолияти давомида бешта давлатда ўйнаган, аммо айнан Испанияда катта муваффақиятга эришган. У «Реал» билан биргаликда 1993 йилда Испания Кубоги ва Суперкубогини қўлга киритган, 1994/95 йилги мавсумда эса мамлакат чемпионатида зафар қучган. Мадридликлар сафида 100 та голга эришиш учун чилилик футболчига атиги 3 та гол етмай қолган. Ҳозирда Саморано дам олиш билан овора, вақти-вақти билан эса турли тадбирларда кўриниш бериб туради.

Фернандо Редондо, 52 ёш

Редондонинг Мадриддаги фаолияти 1994 йилда бошланган. Собиқ ярим ҳимоячи «Реал» билан икки марта Чемпионлар Лигасида ғолиб чиққан, унинг 22 йил аввал «Манчестер Юнайтед»га қарши ўйинда амалга оширган финти эса жаҳон футболининг дурдонаси ҳисобланади. Аргентиналик фаолиятини якунлагач, омма эътиборидан йўқолди ва тинч ҳаёт тарзини танлади.

Мадридда ўтган 11 мавсумда бразилиялик футболчи 527 та ўйинда майдонга тушиб, 69 та гол урган, 89 та голга ассистентлик қилган ва 13 та совринни қўлга киритган. Дунёдаги энг кучли зарбалардан бирининг эгаси бўлган Роберто Карлос УЕФА талқинига кўра икки марта Европанинг энг яхши ҳимоячиси деб топилган. Бутсиларини михга илган Роберто дастлаб ўзини мураббийликда синаб кўрди, аммо ҳозирча ҳеч нарсага эриша олганича йўқ. Аммо «Реал»нинг эшиклари у учун доим очиқ — ҳозирда Роберто клуб тизимидаги маъмурий лавозимлардан бирида фаолият юритмоқда. Бундан ташқари, у мунтазам равишда хайрия тадбирлари билан шуғулланади.

Предраг Миятович, 51 ёш

Миятович «Реал» сафида атиги 3 мавсум ўйнаган, аммо шу унча катта бўлмаган муддат унга ўз номини клуб тарихига ёзиб қўйиш учун етарли бўлган. Бунинг учун фақат битта аниқ зарба бериш кифоя эди — унинг 1997/98 йилги Чемпионлар Лигаси финалида «Ювентус»га урган голи Мадридга «шалпангқулоқ»ни тақдим этган. Югославия терма жамоасининг собиқ футболчиси ҳозирда агентлик фаолияти билан шуғулланмоқда.

Давор Шукер, 54 ёш

Шукер «Реал»га етук ва анча тажрибали футболчи сифатида келган. «Қироллик клуби»даги уч мавсумда Давор 111 та ўйин ўтказиб, 49 та гол урган. Совринлар қаторида Испания чемпионати, мамлакат Суперкубоги ва УЕФА Чемпионлар Лигаси бош совринлари бор. Шукер 2012 йилдан 2021 йилгача Хорватия футбол ассоциациясини бошқарган.

Кларенс Зеедорф, 46 ёш

Зеедорф Мадрид клубига 20 ёшли йигитча бўлиб келиб, у ерни тажрибали ва етук ўйинчи сифатида тарк этади, Кларенс «қироллик клуби»дан кетиш чоғида ўз позициясида дунёдаги энг яхшилардан бири эди. 1996 йилдан 2000 йилгача нидерландиялик футболчи «Реал» билан тўртта совринни қўлга киритган — иккитадан миллий ва халқаро майдонда. Улар орасида, албатта, Чемпионлар Лигаси алоҳида ажралиб туради. Зеедорф 2018 йил августидан 2019 йилнинг июлигача Камерун терма жамоасига мураббийлик қилган. Ҳозирда у ишсиз.

Рауль, 44 ёш

17 ёшидаёқ «Реал» билан профессионал шартнома имзолаган Рауль «Бернабеу»нинг рамзларидан биридир. «Мадрид қироли» номининг берилиши ҳам унинг клуб учун нимани англатишини яхши ифодалайди. Испания пойтахтида туғилган футболчи «қироллик клуби» таркибида энг кўп ўйин ўтказган (741 та), тўпурарлар рўйхатида эса иккинчи ўринда (323), бугунги кунда Мадридни «ёндираётган» Карим Бенземанинг ҳисобида ҳам шунча гол бор. Рауль 16 йил давомида «қаймоқранглилар» билан 16 та совринни қўлга киритган. Афсонавий форвард ҳозирда «Реал»нинг ўринбосарлар жамоасини бошқармоқда ва ўзига хос ютуқларга эришиб келмоқда. Агар яқин йиллар ичида у асосий жамоага ўтадиган бўлса, бу ҳеч кимни ажаблантирмайди.