“Барселона” чемпион бўлди, лекин “Реал” ҳамон олдинда. Жамоаларнинг совринлар жамғариш пойгаси давом этади

“Барселона” Ла Лиганинг 34-турида “Эспаньол” устидан ғалаба қозониб, муддатидан олдин Испания чемпионлигини қўлга киритди.

Каталонияликлар ўз тарихида 99-совринига эга чиқди. Мавсум аввалида “Реал”да ҳам худди шунча соврин бор эди, бироқ улар бир ҳафта олдин “Осасуна” устидан ғалаба қозонди ва Испания Кубоги соҳибига айланди. 

Шу боис, “Мадрид” “Барселона”дан совринлар бўйича ўтиб кетди ва ҳозирда ҳисоб — 100:99. Жорий мавсум “Реал”да яна бир соврин ютиш учун имкон бор. Мадридликлар Чемпионлар Лигаси ярим финалида иштирок этмоқда.  

Испания чемпионатидаги ғалабалар бўйича “қаймоқранглилар” сезиларли даражада олдинда. Барчаси супер муваффақиятли ўтган 1960—70 йиллар эвазига. “Реал” 1961 йилдан 1980 йилга қадар 14 марта чемпионатда зафар қучган. “Барселона” эса бу вақтда фақат бир марта Испания чемпионлигини нишонлаган (1974 йил).

Испания Кубогида эса каталонияликлар олдинда. XXI асрда “Барселона” турнирда етти бор зафар қучган бўлса, “Реал” бу вазифани уч марта уддалаган. Испания Кубоги бўйича мадридликлар, ҳаттоки, иккинчи ўринда ҳам эмас. “Атлетик” ўз тарихи давомида 23 марта мусобақа чемпионига айланган.

 “Реал” Чемпионлар Лигаси ва Европа Чемпионлар Кубогида доминант. Европа Чемпионлар Кубоги даврида “Барселона” фақат бир марта, 1992 йилда, ғалаба қозонган. “Реал”да эса бу кўрсаткич олтитани ташкил этади. Замонавий форматда эса каталонияликлар 4 бора чемпионга айланган бўлса, мадридликлар 8 марта чемпион бўлди. Агар мавсумнинг энг муҳим икки ўйинида ғалаба қозона олса, Карло Анчелотти жамоаси яна бир марта чемпионга айланади. 

Лотин Кубоги 1950 йилларда ўтказилган бўлиб, унда Испания, Португалия, Франция ва Италия чемпионлари иштирок этган. Эва Дуарте Кубогида эса Испания Суперкубогининг аналоги ҳисобланади. 1940 йиллардан 50 йиллар бошига қадар мамлакат чемпиони ва Испания Кубоги соҳиби ўзаро тўқнаш келган. Эва Дуарте — ўша вақтдаги Аргентина раҳбарининг рафиқаси.