Футбол мухлислари орасида Арда Гюлер ва Доминик Собослаи қарама-қаршилигида ким кучлироқ экани ҳақидаги баҳслар авжида. Аммо икки ёш юлдуз майдондаги рақобатни ижтимоий тармоқларга ҳам кўчирди. Аввалига Туркия ва Венгрия терма жамоаси етакчилари майдонда ким устунлигини исботлашга уринган бўлса, кейинчалик бу можарони ижтимоий тармоқларда ҳам қизғин муҳокама қилинишига сабабчи бўлмоқда.
Рақобат қачон бошланди?
Бу қарама-қаршилик 2024 йил март ойидаги Венгрия ва Туркия ўртасидаги ўртоқлик учрашувидан бошланган. Ўша ўйиндаги ягона голни Собослаи пенальтидан киритди. Ўйин сўнгида эса у Гюлерга яқинлашиб, “Сен ўзи ким бўласан?” деган гапи билан ҳозир давом этаётган можарога замин яратди.
1 йил ўтиб, вазият ўзгарди
Бир йил ўтиб, Миллатлар лигаси доирасида Туркия ва Венгрия яна майдонда тўқнаш келди. Биринчи учрашув 3:1 ҳисобида Туркиянинг ғалабаси билан якунланди. Иккинчи баҳсда ҳам турклар венгерларни таслим этишни уддалади — ҳисоб 3:0.
Гюлер бу имкониятни қўлдан бой бермади. У урган голидан кейин лабларига бармоғини қўйиб, Собослаи томонга ишора қилди – “Тинчланинг, жаноб Собослаи”. Камералар нигоҳи венгериялик юлдузнинг нигоҳларига қаратилди, аммо Собослаи мағлубиятни тан олиб, табассум билан жавоб қайтарди.
Можаро ижтимоий тармоқларда давом этди
Кейинчалик жанжал майдон ташқарисида ҳам давом эттирилди. Собослаи ижтимоий тармоқдаги Гюлернинг “жим бўл” ишораси акс этган сурат остига “1088” рақамини ёзиб қолдирди. Бу Гюлернинг “Реал” сафидаги умумий ўйин дақиқалари эди. Бунинг мазмунини шундай тушуниш мумкин: “Сен ким бўлибсан? Бутун мавсум зўрға 1000 дақиқа ўйнаган бўлсанг?”
Гюлер бу ҳолатни бееътибор қолдирмади ва жавоб пости йўллади: “Бу йигитнинг ҳаракатлари жуда кулгили. Унинг оғзини ёпиш учун олтита гол етарлими?”
Бу гап бежиз айтилмаган эди. “Олтита” – бу Туркиянинг Миллатлар лигасида Венгрияга қарши икки ўйинда урган голлари сони (6:1). Гюлер худди шундай деётгандек эди: “Сен менинг ўйнаган дақиқаларим ҳақида гапиряпсанми? Мен эса жамоанг нечта гол ўтказиб юборганини эслатиб қўяман”.
Бу оддий рақобатми ёки янги тренд?
Бу шунчаки футболчилар ўртасидаги оддий зиддиятми ёки янги футбол тренди? Кўпчилик бундай можаронинг футболга қўшимча завқ қўшишини айтмоқда. Сабаби майдондаги рақобат ижтимоий тармоқларга кўчганда, мухлисларнинг қизиқиши янада ортади.
Аммо бошқалар бу каби тортишувлар футболчиларнинг клубдаги ривожланишига халал бериши мумкинлигини таъкидламоқда. Бироқ, баъзилар аксинча, бундай рақобат уларга мотивация бериши ва янада юқори савияда ўйнашга ёрдам беришини айтмоқда. Доминик Собослаи – “Ливерпуль”нинг асосий юлдузларидан бири, Гюлер эса “Реал Мадрид”да ўз ўрнини топишга ҳаракат қилаётган футболчи ҳисобланади. Ҳар иккиси ҳам келажакда футбол оламининг энг ёрқин юлдузларидан бирига айланиши мумкин. Шу боис мутахассислар футболчиларни ушбу жанжални тезроқ якунлашга чақирмоқда. Миллий терма жамоалар нуқтайи назаридан қаралса, бу масала миллий ғурур туфайли юзага келганини тушуниш мумкин. Аммо футболчиларнинг шахсий муаммолари ва ижтимоий тармоқлардаги фаоллиги уларнинг келажакдаги обрўсига катта таъсир кўрсатиши мумкин.
Ҳозирча бу можаро якунлангани йўқ. Футболчиларнинг ижтимоий тармоқлардаги ҳар бир пости остида қизғин муҳокамалар давом этмоқда. Иккала футболчи ҳам шу орқали машҳурлик қозонмоқда. Уларнинг рақобати шу қадар қизғин тус олдики, ҳозирда бу мавзу чемпионат турнир жадвалларидан ҳам кўпроқ муҳокама қилинмоқда.
Ким билади, балки кейинги мавсумда бу икки футболчи яна майдонда тўқнаш келар? У ҳолда, можаро давом этиши аниқ.
Изоҳ (0)