“Барселона” ва “Негрейра иши” ҳамон матбуотдаги асосий мавзулардан бири бўлиб турибди. 17 апрель куни каталонлар президенти Хоан Лапорта ушбу масала юзасидан клуб позициясини билдириш учун матбуот анжумани ташкил қилди.
Унда “Барселона” раҳбари нафақат Хавьер Тебас (Ла Лига президенти), балки “Реал” раҳбариятига ҳам “тош отди”.
Нималар бўлаётгани ҳақида қисқача: 1,5 ой олдин “Барселона” бир неча йил давомида Испания футбол федерацияси (RFEF) Ҳакамлар қўмитаси (CТА) вице-президенти Энрикес Негрейрага пул тўлаб келгани аниқланди. Каталон клубининг ўзи Негрейрага ҳакамлар бўйича ҳисоботлар учун пул тўлаганини тасдиқлади. Қайд этилишича, Негрейра 2001 йилдан бери каталон клубидан камида 7,3 миллион евро пул олган, аммо суд фақат охирги ўн йилликдаги ўтказмалар бўйича иш олиб боради. Шунингдек, Негрейра асосан 2014 йилдан 2018 йилгача олган 3 миллион еврога алоҳида эътибор берилади. |
“Барселона” ички текширув олиб бормоқда
Клуб президенти айни вақтда бу масала юзасидан ички текширув кетаётгани ва у жамоага алоқадор бўлмаган ташқи фирмага тақдим этилганини айтди.
ОАВдаги миш-мишлар ҳақида
Икки ой давомида даҳшатли туҳматлар остида қолдик. Бу гаплар реаллик билан умуман ҳамоҳанг эмас. “Барселона” ҳалол ўйин намунаси бўлган ва шундай бўлиб қолади.
Ички текширув ҳақида
Биз 629 та ҳужжат ва 43 та видеоёзув йиғдик. Клубга алоқадор бўлмаган фирма шаффоф ҳаракат қилган ҳолда иш юзасидан дастлабки маълумотлар олишимизга кўмаклашди.
Текширувлар шуни кўрсатяптики, ҳеч қандай қонун бузилиши ҳолати рўй бермаган. Энди буни адолат ҳукмига қолдиришимиз мумкин. “Барселона”дан барча гумонлар олиб ташланишига ишончим комил.
Ҳакамларга таъсир ўтказиш ҳақидаги гаплар борасида
Қайд этиш керак, 7,3 миллион евро 18 йил давомида тўлаб келинган, қандайдир бир йил ичида эмас. Бу муҳим лавозимларда ишлайдиган одамлар томонидан тайёрланган муҳим ва керакли ҳисоботлар эди.
Негрейра CТА вице-президенти бўлгани ҳақида гапирар эканмиз, хизмат кўрсатган унинг ўғли эканини унутмаслик керак. CТА вице-президенти ўйинлар натижасига таъсир ўтказиш ёки ҳакамлар тайинлаш ҳуқуқига эга бўлмаган. Бу ҳақда федерация регламентида ҳам гап борган.
“Реал” айбловчи томондагилардан бири. Клублар ўртасидаги муносабат бузилган
“Барселона”га маънавий зарар етказаётган душманлар ҳақида
Можарони қўзғаганлар ҳакамларни сотиб олиш ҳақида ҳеч қандай далил бўлмаган иш орқали “Барселона”нинг обрўсига путур етказмоқчи ва Каталония бирлигининг энг ёрқин намоёндаси бўлган элементни яксон қилиш истагида. Ҳукумат тепасидаги шахслардан бири “Барселона” каталон бирлигининг рамзига айланганига чидай олмаяпти.
Маънавий зарар жуда муҳим жиҳат. Биз клубни ҳимоя қилиш учун юридик ҳаракатлар олиб боряпмиз ва бунда давом этамиз. Ҳали клубга келтирилган руҳий талафот учун компенсация талаб қиламиз. У молиявий томондан, хусусан, астрономик миқдордаги пуллар билан баҳоланиши мумкин.
Хавьер Тебаснинг ҳаракатлари борасида
Ла Лига президенти яққол нопрофессионалликка йўл қўйганини айтмоқчиман. У иш бўйича нотўғри ҳужжатларни тақдим этди. Унга тилини бироз жиловлаши кераклигини айтмоқчиман.
Тебас муаммо пайдо бўлганда вазиятни кўпиртириши эмас, менга қўнғироқ қилишини истардим. “Барселона”га нисбатан қарашини билган ҳолда унинг бу ишидан ҳайрон қолмадим. Тебас ўзини манманлардек тутди, унга мардлик ва профессионаллик етишмайди.
Бошқа томондан Испания футбол федерацияси президенти Рубиалес ва ФИФА президенти Инфантинога миннатдорчилик билдираман. Улар “Барселона”га қарши кампанияга қўшилмади ва суд қарорини кутмоқда.
Ла Лига ва УЕФА билан муносабат ҳақида
Биз Тебас ёки Ла Лигага бўйсунмаймиз, Суперлигага интиламиз. Лига президенти вазиятдан фойдаланиб, оммавий самосудга УЕФАни ҳам чорлади.
УЕФА билан мунтазам алоқада бўлиб турибмиз ва улар ОАВдаги кампания ёлғон маълумотларга асосланганини билади. УЕФА билан бошқа масалалар юзасидан келишмовчиликлар бор, бироқ ҳамон алоқалар сақланиб қолган дея оламан.
“Реал” ҳақида гапирар экан, Лапорта Мадрид клубини Франко режими жамоаси деб атади.
Айбловчилар орасида “Реал”нинг борлиги ҳақида
Суд жараёнида алоҳида айбловчи сифатида қатнашадиган клуб борасида гапирмоқчиман. Ўзини ноқулай аҳволга тушиб қолганини айтаётган клуб ҳақида. Доим ҳакамлар кўмагига суянадиган клуб ҳақида. Режим жамоаси (Франсиско Франко давридаги 1939—1975 йиллар назарда тутиляпти – изоҳ “Дарё”) ҳисобланган, сиёсат ва иқтисодиёт элитасига яқин бўлган клуб ҳақида.
70 йил давомида “Реал”нинг собиқ ходимлари, ўйинчилари ёки раҳбарият аъзолари CТА президенти сифатида ишлади. Бу одамлар 70 йил давомида майдонда адолатни таъминлайдиган ким бўлишини белгилади.
“Барселона” ва “Реал” ўртасидаги муассасавий муносабатлар барбод бўлди. Бу “Реал” томонидан содир этилган нотўғри иш бўлди. Бу масала туфайли Перес катта босим остида қолишини истардим. Клублар ўртасидаги катта рақобатдан келиб чиқадиган бўлсак, бу нормал ҳолат.
“Реал” Лапортанинг гапларига видеолавҳа билан жавоб қайтарди
Мадрид жамоаси “Барселона” президентининг бу гапларини жавобсиз қолдирмади. Ўша куниёқ клуб телеканалида “Қайси клуб бошқарув режими клуби бўлган?” номли видеоролик эълон қилинди. Унда “Реал” қуйидаги фактларни санаб ўтган:
- “Барселона” Франкога уч марта медал топширган ва 1965 йилда диктаторни клубнинг фахрий улушдори деб эълон қилган.
- “Камп Ноу”нинг очилиш маросимини Франконинг вазирларидан бири Хосе Солис Руис олиб борган.
- Франсиско Франко “Барселона”ни уч марта банкротликдан қутқариб қолган.
- “Барселона” Франко даврида чемпионатда 8 марта, Генералиссимус Кубогида (Испания Кубоги) эса 9 марта ғолиб бўлган.
- Франко режими вақтида “Реал”нинг Ла Лигадаги дастлабки чемпионлиги учун 15 йил кетганди.
- Фуқаролар уруши вақтида “Реал”нинг футболчи, директор ва ходимлари ўлдирилганди.
- “Барселона” Франкога олтин ва бриллиантлар тақдим этган.
Изоҳ (0)