Оилавий қарзлар, француз адабиёти, “тиш рақси” ҳақидаги ҳазиллар ва ҳатто танқидчилардан ҳожатхонага қочиш воқеаси — Ли Бён Хоннинг унутилмас хотиралари жуда кўп.
Француз адабиёти ва кино
Ли Бён Хон на болалигида, на ёшлигида актёр бўлишни орзу қилган. У бу ҳақда ҳатто ўйламаганди, аксинча ўз ҳаётини француз адабиёти билан боғлашни режалаштирган.
Мутахассисликни танлаётганимда французча гапирсам, жуда зўр бўларди, деб ўйладим. Бир йил шу бўйича ўқидим, кейин эса KBS каналига қабул қилишди.
Кунларнинг бирида Ли Бён Хон уйда дам олаётганди. Тўсатдан онасининг таниши KBS канали учун ариза намунасини олиб келди. Бўлажак актёр одамлар олдида чиқишни ёқтирмасди. Таклифни рад этмоқчи бўлганида онасининг: “Шунчаки синаб кўр, тажриба орттириш учун” деган сўзлари уни тўхтатди.
Гарчи дастлабки натижалар уни қувонтирмаган бўлса-да, янги соҳа актёрни ўзига жалб этди. Ўша пайтда кетма-кет 3 та муваффақиятсиз лойиҳа инқирозни англатади, деб ҳисобланарди: гўё актёр бундай вазиятда бош ролни қайта ололмайдигандек.
Тўртинчи фильмим ҳам муваффақиятсизликка учради. Қизиғи, мен уч марта омадсизликдан кейин тўртинчи фильм учун имкониятни қўлга киритгандим. Бешинчиси — “Юрагим парчаси” (1999) эса муваффақият қозонди.
Оилавий қарзлар
Актёр — оиланинг тўнғич фарзанди. Унинг Ли Жи Ан (аввалги исми Ли Йн Хи) исмли синглиси бор, у 1996 йилда “Корея гўзали” унвонини қўлга киритган.
Актёрнинг отаси 1998 йилда вафот этган. У сурункали касалликка чалинганди — чет элда ишлаётганида ҳушини йўқотган, уни дарҳол топа олишмаган. Оқибатда касалхонага етиб боролмай, жони узилган.
Бизнинг қарзларимиз бор эди. Уларни тўлаш учун акам ўзини масхара қиладиган реклама роликларида суратга тушган. Ўша пайтда у барча қарзларни тўлиқ узишга эришган.
Соғлом тишлар рақси
2007 йилда Японияда мухлислар билан учрашувда актёр жўшқин рақс билан чиқиш қилди. Кейинчалик бу чиқиш “건치 댄스” (соғлом, текис, гўзал тишлар рақси) деб ном олди.
Концерт продюсери“Жилмаймасанг, қўрқинчили кўриняпсан”, деган. Мен бутун рақс давомида табассум билан рақсга тушганман. Аммо роботга ўхшаб қолишимни сира ўйламагандим!
Унинг рақси мемга айланди. Ли Бён Хон эса концертдан сўнг ўзини видеода кўргач, жуда оқилона иш қилди: актёр суратни ижтимоий тармоқдаги саҳифасига жойлади.
Одамлар барибир буни кўришади. Нима учун буни ўзим эълон қилмаслигим ва ҳеч бўлмаганда хушчақчақ кўринишга уриниб кўрмаслигим керак экан, дейди актёр.
Ҳожатхонага яширинган
2001 йилда актёр “Арқон билан сакраш” фильмида бош ролни ижро этди. Фильмнинг дастлабки намойишида кутилмаган ҳодиса содир бўлди.
Кулгили жойи йўқ саҳна намойиш қилинганда, тўсатдан 30 ёшли Ли Бён Хон залдан кулги овозини эшитиб қолди.
“Биз тамом бўлдик”, деб ўйладим. Шунинг учун менежеримга: “Мен ҳожатхонага яшириниб тураман, ҳаммаси ўтиб кетгандан сўнг келиб, мени олиб кетинг”, дедим.
Seaнс якунлангач, менежер актёрнинг олдига келиб, ҳаммага фильм ёққанини айтади, аммо Ли Бён Хон бунга ишонмайди. Фильм ҳақидаги тақризларни ўқигандагина, ўшанда ҳаяжонланганидан кулги оҳангини илғай олмаганини тушунади.
Шахсий агентлик
2006 йилда Ли Бён Хон менежери билан бирга BH Entertainment компаниясини ташкил қилади. Компанияда BH ҳомийлиги остида Пак Бо Ён, Ким Го Ин, Пак Жин Ён, Хан Ҳё Жу ва бошқа актёрлар фаолият юритади.
2023 йил май ойида Ли Бён Хоннинг компанияси барча актёрлари учун Вьетнамнинг Дананг шаҳрига сафар уюштирди. Бу билан агентлик ташкил этилганининг 17 йиллиги нишонланди. Барча ходимлар ва актёрларни бир жойга тўплаш осон кечмади, шу боис тадбир 6 ой олдиндан режалаштирилганди.
Истеъдодлар шоуси пайтида караокеда қўшиқ айтганимизда, барчамиз бир бутун бўлиб кетдик. Ли Бён Хон ҳаммамизга фахр билан қараб турарди, дейди Пак Бо Ён.
Постларига хотинининг шарҳлари
2013 йилда Ли Бён Хон ва Ли Мин Чжон турмуш қурди. Жуфтликнинг иккита фарзанди бор, бироқ эр-хотин ўртасидаги муносабатлар доим ҳам силлиқ кечмаган. Актёрнинг никоҳдан ташқари муносабатлари бўлган, аммо у хотини билан ажрашиб кетмади. Аёли уни кечирди, ҳатто ижтимоий тармоқ фойдаланувчилари унга қарши чиқишганда ҳам, эрини ҳимоя қилди.
Голливуддаги иши
2013 йилда Ли Бён Хон “Кобра ҳамласи 2” фильмида илк бор рол ижро этди. Суратга олиш пайтида актёрни “шаҳзода” деб аташарди, у камгап бўлиб, деярли ҳеч ким билан мулоқот қилмасди. Актёр инглиз тилида гапиришга қийналарди.
Мен содир бўлаётган воқеаларнинг кўпини тушунолмасдим, дейди актёр.
Ли Бён Хон Брюс Уиллис билан иккита фильмда бирга ишлаган: “Кобра ҳамласи 2” ва “RED 2”. Уларнинг муносабатлари яхши, чунки Брюс Уиллис Ли Бён Хонга жуда ғамхўрлик қилган.
Қизиқарли факт: “RED 2” фильмидаги бош қаҳрамонлар йирик планда тасвирланаётган саҳнада, Брюс Уиллис режиссёрдан Ли Бён Хонни ҳам йирик планда олишини сўраган.
Ли Бён Хон — парадоксал шахс. У жамоат олдида чиқишларни хушламайди, аммо корейс киносининг юзига айланди. Француз адабиёти ҳақида ўйларди, бироқ ўзини Голливудда намоён этди. Унинг ҳаёти мукаммал карьера ҳақида эмас, балки қандай қилиб йиқилишлар, кўз ёшлари ортидан кулги ва ҳатто бемаъни рақслар ҳам муваффақиятга эришиш учун поғона бўлиши мумкинлиги ҳақида.
Изоҳ (0)