Бугун, 26 декабрь куни Netflix стриминг тизимида “Калмар ўйини” сериалининг иккинчи мавсуми премераси бўлиб ўтди. Етти қисмдан иборат корейс драмасини инглиз тилидан ташқари рус, корейс ва бошқа хорижий тиллардаги субтитрлар билан томоша қилиш мумкин.
Янги мавсумда аввалги ўйин ғолиби бўлган Сон Ки Хун қонли синовларга чек қўйиш мақсадида хавфли мусобақага қайтиб боради. 456-рақамли иштирокчи ролини худди биринчи мавсумдагидек Жанубий кореялик актёр Ли Жонг Же ижро этган.
“Калмар ўйини 2” бўйича Rotten Tomatoes рейтинги ҳозирча йўқ, профессионал кино танқидчилар аллақачон ўз фикрларини билдириб ўтган. Тhе Hollywood Reporter журналистларининг таъкидлашича, иккинчи мавсум биринчисидан зерикарлироқ чиққан ва финал воқеалар 2025 йилга мўлжалланган учинчи мавсум учун муқаддимадек туюлган. Variety ва The Verge нашрлари эса сериалнинг давомини юқори баҳолади.
2021 йил сентябрь ойида чиққан “Калмар ўйини”нинг биринчи фасли Netflix’нинг энг машҳур лойиҳаларидан бири бўлди ва биринчи 28 кунида 1,6 миллиард соатдан ортиқ томоша қилинди. Лойиҳа ижодкорлари бир қатор мукофотларга сазовор бўлди.
Маълумот учун, “Калмар ўйини”да катта пул мукофоти ваъда қилинган ўйинда омон қолиш учун шафқатсиз синовларда қатнашишга мажбур бўлган ва қарзга ботган бир гуруҳ одамлар ҳақида ҳикоя қилади. Сериал иштирокчилари болалар ўйини асосида тузилган бир нечта ҳалокатли ўйинларда иштирок этади. Ҳар бир мағлубият ўлимни англатади.
Изоҳ (0)