40 ёшдан кейин ҳаётнинг янги босқичи бошланади, дейишади. Муваффақиятли карьера қуриб, 40 ёшдан сўнггина она бўлган машҳур корейс актрисалари ушбу фикрнинг яққол мисоли.
Сон Е Жин
Таниқли актёр Хён Бин билан турмуш қурган актриса Сон Е Жин 2022 йилнинг ноябрь ойида илк марта она бўлган. Актриса қувончини мухлислари билан бўлишар экан, 2022 йил унинг ҳаётида ўчмас из қолдирганини айтиб ўтган.
“Сизга маълумки, оиламиз аъзолари сони яна биттага кўпайиб, бизнинг фарзандимиз дунёга келди. Фарзанд ўзига хос парваришни, меҳрни талаб қилишини яхши тушунаман, шунингдек менга кўплаб инсонларнинг ёрдами ҳам керак бўлади. Мен бу инсонларга чин дилимдан миннатдорчилик билдираман”, деган эди актриса.
Сон Е Жин ўзбек томошабинларига “Ёз ифори” сериалидаги образи билан яхши таниш.
Чхве Жи У
“Қиш сонатаси”даги Южин образи орқали машҳурликка эришган актриса Чхве Жи У 2021 йилнинг май ойида 45 ёшида илк марта она бўлган эди. У жажжи қизалоқни дунёга келтирган.
Хани Ли
Актриса Хани Ли 40 ёшида соғлом қизалоқни дунёга келтирган. Ханининг қизи Сеул шаҳридаги туғруқхоналардан бирида дунёга келган. Актриса “Бир аёл” сериалида суратга тушаётган вақтида ҳомиладор эканлигини билиб қолган.
Ли Ён Э
“Сарой жавоҳири” сериалидаги Тангем образи билан ўзбек томошабинлари меҳрини қозонган актриса Ли Ён Э 2011 йилда эгизак фарзандларни дунёга келтирган. Ўшанда у 40 ёшда эди.
Актриса АҚШда истиқомат қилувчи кореялик бизнесменга турмушга чиққанини узоқ муддат оммадан сир тутган. Ли Ён Э ижтимоий тармоқлардаги саҳифаларида оналикнинг бахтли онлари акс этган суратлар ва маълумотлар билан тез-тез бўлишиб туради.
Изоҳ (0)