Жанубий Корея ижодкорлари томонидан тақдим этилган “Қалбим чечаги” сериали нафақат Ўзбекистонда, балки дунё мамлакатлари бўйлаб машҳурликка эришди. Қизиқарли сюжет, маҳоратли актёрлар ансамбли ҳамда ёқимли қўшиқлари туфайли сериал дунё томошабинларида корейс сериалларига нисбатан қизиқиш уйғота олди.
Фильм сюжети ҳақида
МБC томонидан суратга олинган “Қалбим чечаги” сериали 1997 йил томошабинларга тақдим этилди. Ушбу сериал соддадил ва меҳрибон етим қиз Ли Юн Хи, хонанда бўлишни орзу қиладиган бадавлат тадбиркорнинг ўғли Канг Мин Хи ва мамлакатнинг етакчи мода уйларидан бирининг дизайнери Ли Жун Хи ўртасидаги севги учбурчаги ҳақида ҳикоя қилади.
Афсуски, болалар уйидан отасининг дўсти томонидан олиб кетилган Ли Юн Хини бир қанча муаммолар кутиб турар эди. Янги оила билан яшаш қанчалар қийин бўлмасин, қиз барчасига сабр қилади ва бир куни зиёфатда Ли Жун Хи билан танишиб қолади. Ли Юн Хининг ташқи кўриниши йигитнинг собиқ севгилисига жуда ҳам ўхшарди.
Бир оздан сўнг Ли Юн Хи дугонаси ишлайдиган тунги клубда Канг Мин Хи билан учрашиб қолади. Канг Мин Хи бир қарашдаёқ соддагина Ли Юн Хини севиб қолади. Таниқли қўшиқчи йигит ва қизнинг муносабатлари яқинлашиб борган сари йигитнинг отаси уларнинг муҳаббатига тўсиқ бўлаверади.
Бу орада Канг Мин Хининг муҳаббатдаги рақибига айланиб улгурган ишбилармон тадбиркор Ли Жун Хи дизайнерлик борасида ўзини синаб кўраётган Юн Хига нисбатан илиқ ҳис-туйғуларга берилади. Сабаби у қачон муаммоларга дуч келса, йўқ жойдан пайдо бўлиб, унга ёрдам берарди.
Рақибини йўлдан олишни истаган қўшиқчи йигит яқинлашиб келаётган концерт дастурига севгилиси ҳамда Ли Жун Хини таклиф этади ва у ерда қўшиқ куйлаб, севгилиси Ли Юн Хига севги изҳор қилади. Шу орқали у рақибига ҳаммасини тушунтириб қўяди.
.jpg)
Сериал ҳали эфирга узатилмай туриб, оммавий ахборот воситаларининг эътиборига сазовор бўлди. Сабаби сериалда аллақачон машҳурликка эришган актёр ва актрисалар иштирок этиши маълум бўлган эди.
Сериал кутилганидан ҳам кўпроқ шон-шуҳратга эришди, Корея томошабинларининг энг севимли картинаси сифатида белгиланди. Дастлаб сериал намойишининг бошида томошабинлар шунчаки икки ёшнинг муҳаббати акс этган деб ўйлаган, аммо кейинчалик сериал минглаб, миллионлаб мухлисларга эга бўлди. Қуйида сериалнинг бош қаҳрамонларининг тақдири қандай кечгани ҳақида ҳикоя қилинади.
Ан Же Ук — Канг Мин Хи образида
Актёр, хонанда ва композитор Ан Же Ук 1971 йил 12 августда Жанубий Кореянинг Сеул шаҳрида туғилган. 1994 йил университетни тамомлаган актёр илк бор “Кўр қушлар қўшиғи” драмасида рол ижро этади. Нафақат муваффақиятли актёр, балки таниқли қўшиқчи 5 та мусиқий альбом чиқарган. 1997 йилда у ўзининг “Абадий” номли альбомини тақдим этади ва ушбу мусиқий тўплам 700 минг нусхада сотилади. Актёр айнан шу альбомдан ўрин олган қўшиқларни “Қалбим чечаги” сериалида ҳам ижро этган. Сериал актёрнинг шахсини ҳамда қўшиқларини ҳам оммалаштириб юборди.
Ундан сўнг бирин-кетин фильмларда суратга тушиб, томошабинлар кўнглини забт этган актёр 2013 йил февраль ойида АҚШда мия билан боғлиқ жарроҳлик амалиётини ўтказди. Бир йиллик қайта тиклашдан сўнг актёр 2014 йил апрель ойида мусиқий ижодини бошлади. Актёрга оид қизиқарли маълумотларга кўра, у ухлашни жуда яхши кўради, ҳатто рекорд кўрсаткичи 36 соатни ташкил қилган.
Кўк рангни яхши кўрадиган актёр санъат йўлини танламаганида, албатта, тадбиркор бўларди. У концертда жонли ижрода куйлаётган қўшиқ сўзларини унутиб қўйганини ҳаётидаги энг кулгили ва эсда қоларли воқеа деб билади. Актёр хушбўй шамлар, парфюмерия, мусиқа, голф, компакт-дисклар тўплами ва овқат тайёрлашни яхши кўради. Актёр 2015 йилда актриса Чхве Хён Жу билан турмуш қурган. Уларнинг бир ўғил ва бир қиз фарзанди бор.
Чхве Жин Сил Ли Юн Хи образида
Чхве Жин Сил 1968 йил 24 декабрда Сеулда туғилган. Актриса Жанубий Кореянинг энг таниқли ижодкорларидан бири, “Миллат актрисаси” мақомига эга. У оилада тўнғич фарзанд бўлиб, ота-онаси болалигида ажрашиб кетган. Оиласи жуда қашшоқлигидан унинг онаси кўча чодирида турли хил овқатлар сотган. Қизалоқ болалигидаёқ камбағал бўлиб яшашдан қутулиш учун машҳур инсон бўлишни орзу қилган. Кейинчалик у юқори маош оладиган модел ва машҳур актрисага айланган бўлса-да, тежамкорлиги сақланиб қолган.
У бирин-кетин реклама ва фильмдаги ижролари ортидан машҳурликка эришди. 1994 йил унинг собиқ менежери Бе Бен Су ўлдирилади ва актриса жиноятга гувоҳ сифатида чақирилади. Ушбу машъум воқеа катта шов-шувларга сабаб бўлди. Актрисанинг жиноятга алоқадорлиги ва туҳмат қилинганлиги ҳақидаги миш-мишлар кўпайиб борди. Унинг ҳаёти бир неча маротаба хавф остида қолгани, 1995 йил автоҳалокат, таъқиблар ва икки маротаба номаълум шахслар томонидан ўғирлаб кетилгани ҳақида ҳам хабарлар тарқалган.
2000 йилга келиб актрисанинг шахсий ҳаётида янгилик юз берди, Чжо Сун Мин билан турмуш қурди. Лекин орадан кўп ўтмай, жуфтлик орадаги низо ва турмуш ўртоғининг ҳомиладор актрисага қўл кўтаргани учун ажрашишга қарор қилган.
2008 йил 2 октябрь куни 39 ёшли актриса Чхве Жин Сил ўз уйида осилган ҳолда топилди. 2008 йил сентябрда комик актриса Жон Сун Хенинг турмуш ўртоғи ўзининг машинасида ўлик ҳолда топилади ва бу жиноят айнан Чхве Жин Силдан гумон қилиниши уни қаттиқ тушкунлик гирдобида қолдирганди. Айнан ушбу воқеа актрисанинг ўлимига сабаб бўлиши мумкин.
Бу воқеа интернет оламида ҳам мисли кўрилмаган даражада шов-шув бўлди.Унинг ўлими Жанубий Кореяда ўз жонига қасд қилишнинг қисқа вақт ичида ўсишига олиб келди, ўша ойда одатдагидан кўпроқ 700 та ҳолат қайд этилган. Орадан бир ярим йил ўтиб, актрисанинг укаси ҳам ўз жонига қасд қилади — у опасининг ёнига дафн этилади.
Актрисанинг бевақт ўлимига жавобан Жанубий Корея ҳукумати интернет фойдаланувчиларининг тармоққа жойлаётган маълумотларини назорат қилишга ҳаракат қилган. Ҳозирда актрисанинг икки фарзандига унинг онаси ғамхўрлик қилади.
Ча Ин Пё — Жун Хи Ли образида
Ча Ин Пё 1967 йилнинг 14 октябрида Сеул шаҳрида туғилган. Унинг отаси йирик тадбиркор бўлиб,Wоосунгй Shipпинг порт компаниясини бошқарарди. У ўғлининг ўз ишини давом эттиришини хоҳларди. Бироқ Ча Ин Пё актёрликка қизиқади. Аммо мактабни битиргач, отасининг хоҳиши билан иқтисод факультетига ўқишга киради.
“Қалбим чечаги” эфирга узатилганидан сўнг Ча Ин Пёнинг юлдузлик онлари бошланди. Ушбу сериали корейс телевидениесининг хорижга трансляция қилиниб, жаҳон миқёсида эътироф этилган муваффақиятли лойиҳасига айланди.
2009 йилда Ча Ин Пё ўзини ёзувчи сифатида синаб кўрди ҳамда аёллар муаммоларига бағишланган “Алвидо, Хилл” деб номланган китобини нашр эттирди. Ушбу китоб ўқувчилар томонидан илиқ қарши олинган.
Ча Ин Пё 1993 йилда актриса Син Э Ра билан танишиб, 1995 йилда у билан турмуш қурган. Юлдузли жуфтликнинг уч нафар фарзанди бор.
Изоҳ (0)