Моҳирона ижроси билан Голливудни забт этган корейс актёрлари

Корейс актёр ва актрисалари Голливудни фаол эгалламоқда. Мазкур актёрлар ўзларининг эсда қолиши қийин бўлган номларини аллақачон Голливуд тарихига ёзиб қўйди.

Пе Ду На

Лойиҳалар: “Булутли атлас”, “Юпитернинг юксалиши”, “Саккизинчи туйғу” Netflix сериали, “Исёнкор ой” (1,2 қисм).

Голливудга продюсерларнинг эмас, ўзининг таланти ва харизмаси туфайли кириб келган бетакрор актриса.

У халқаро кинофестиваллардаги фильмларда кўриниш бергач, режиссёрлар – опа-сингил Вачовскилар (улар “Матрица” фильмини суратга олишган) эътиборига тушади. Шундан сўнг улар актрисани ўз лойиҳаларига таклиф қилишади.

Уларнинг биринчи лойиҳаси 2012 йилда суратга олинган “Булутли атлас” фильми бўлди. Бу фильмда Пе Ду На энг муҳим роллардан бирини ижро этган ва фильм атмосферасига мукаммал тарзда мос келган.

Шундан сўнг унга Голливуддан бошқа таклифлар ҳам кела бошлайди. У Вачовскилар билан ҳамкорликни давом эттириб, Netflixънинг култ сериали “Саккизинчи сезги”да иштирок этади.

Ма Дон Сок

Лойиҳалар: “Умрбоқийлар” (Marvel).

Ма Дон Сок — ажойиб типажли актёр бўлиб, у гангстерга ҳам, полициячи ролларига ҳам мос келади ва қўрқинчли кўринса-да, аммо яхши йигитларни ҳам аъло даражада ижро этади.

Аммо уни Marvelънинг энг омадсиз лойиҳаларидан бири – “Умрбоқийлар”га чақиришади. Фақат битта мақсадда – уларга осиёлик аудитория керак эди.

“Умрбоқийлар” фильми тезроқ пул ишлашни мақсад қилган ҳолда шошилинчда ёзилган фильмдек таассурот қолдиради. Ажойиб актёрлардан бошқа, фильмда “ажойиб” деб аташ мумкин бўлган нарса деярли йўқ.

Шунга қарамай, Ма Дон Сокнинг истеъдодини инкор этиб бўлмайди – қайси фильмда рол ўйнамасин, у ҳар доим ролини маҳорат билан ижро этади.

Ма Дон Сок – замонамизнинг энг талабгир актёрларидан бири ва у Голливуднинг муваффақиятсиз фильмларида рол ўйнаш заруратисиз ҳам бутун дунёда машҳур.

Клаудиа Ким, ҳақиқий исми Ким Су Ҳьюн

Лойиҳалар: “Қасоскорлар: Алтрон даври” ва “Фантастик махлуқлар: Грин-де-Валд жиноятлари”

Ким Су Хён “Қасоскорлар” фильмига кастинг орқали келади. Marvel айнан доктор ролига осиёлик актриса излаётган эди ва халқаро тажриба ҳамда мукаммал инглиз тили актрисага ушбу лойиҳада қатнашишига ёрдам беради.

“Қасоскорлар” фильмидаги роли эпизодик бўлса-да, бу рол унга бошқа катта лойиҳа – “Ажабтовур махлуқлар”да иштирок этиш имконини берди. У бу фильмда ғайриоддий, ҳатто экзотик дейиш мумкин бўлган образ – Нагайна, тавқи лаънат туфайли илонга айланувчи қизни ўйнайди. Бу рол кўплаб муҳокамаларга сабаб бўлади, чунки “Гарри Поттер”га кўра, Нагайна исмни тилга олиш мумкин бўлмаган илон эди.

Бу лойиҳа туфайли актриса Голливудда ўз ўрнини мустаҳкамлаб олди.

Ли Чон Же

Лойиҳалар: “Калмар ўйини” сериали муваффақиятидан сўнг, у “Юлдузлар жанги: Акколит” лойиҳасида иштирок этди.

“Калмар ўйини” сериали туфайли Ли Чонг Же халқаро саҳнада энг кўп муҳокама қилинадиган корейс актёрларидан бирига айланди.

Шунингдек, бу рол ва ўзининг истеъдоди туфайли актёр “Эмми” мукофотига лойиқ кўрилган.

Сериалнинг муваффақияти Ли Чонг Жега “Юлдузлар жанги” лойиҳасига киришга имкон беради. У бу фильмда асосий қаҳрамонлардан бирини ўйнайди.

Стивен Ён

Лойиҳалар: “Мурдалар”, “Минари”.

Умуман олганда, Стивен келиб чиқиши корейс бўлган америкалик актёр. Шунга қарамай, унинг Голливуддаги лойиҳаларда иштирок этиши осиёлик актёрларнинг мавқейини мустаҳкамлашга ёрдам берди. У ҳатто Голливудда осиёлик актёрларнинг аҳамиятини ифодаловчи тимсолга айланди.

Уни машҳур қилган сериаллардан бири бу 2010 йилдан 2020 йилгача эфирга узатилган “Мурдалар” эди. Унинг персонажи томошабинлар орасида энг севимлилардан бирига айланди.

Бу катта муваффақиятдан сўнг, 2020 йилда уни “Минари” фильмида рол ижро этишга таклиф қилишди. Ушбу фильм кейинчалик “Хорижий тилдаги энг яхши фильм” номинациясида “Олтин глобус”ни қўлга киритди.

Бу мукофот қизғин баҳс-мунозараларга сабаб бўлди, чунки “Минари” — Америка фильми бўлса-да, ундаги диалоглар корейс тилида эди.

Юн Ё Жон

Лойиҳалари: “Минари”

Юн Ё Жонг Жанубий Кореянинг энг ҳурматли актрисаларидан бири. Унинг фаолияти 1970 йилда бошланган. “Минари”да у иккинчи даражали эпизод — буви ролини ўйнайди. Актриса ўз ролини шу қадар моҳирона ижро этадики, бу роли учун “Оскар” олади.

Юн Ё Жон актёрлик номинациясида “Оскар” билан тақдирланган биринчи корейс актрисасига айланди, бу унинг учун ҳам, бутун Осиё кинематографияси учун ҳам тарихий воқеа бўлди.