Жанубий Кореянинг кино ва драма саноати нафақат жозибали актёрлари ва кучли сюжетлари, балки инсон иродасининг ҳақиқий синовлари билан ҳам машҳур. Кўплаб юлдузлар экран ортида шахсий муаммолар ва соғлиқ билан боғлиқ қийинчиликларга дуч келишган ва оғир касалликларни енгишга муваффақ бўлган. Улар фақатгина саҳнада эмас, балки ҳаётнинг ўзида бўлган жангда ҳам ғалаба қозонган ҳақиқий қаҳрамонлардир. Ушбу мақолада касалликка бўйсунмаган, аксинча уни енгиб, санъатга қайтган корейс санъаткорлари ҳақида ҳикоя қиламиз.
Ким У Бин
У Бин фаолиятини модел сифатида бошлаган ва кейинчалик актёрликда ўзини синаб кўрган. У “Мактаб 2013” сериалидаги роли билан машҳурликка эришди, кейинроқ “Меросхўрлар” ва “Телба ошиқлар” драмалари унинг муваффақиятини мустаҳкамлади. Ким У Бин яқин келажакда энг таниқли актёрлардан бирига айланишини башорат қилишар эди, аммо унинг тақдири бир кунда ўзгариб кетди.
2017 йил 24 майда актёрга бурун-ҳалқум саратони ташхиси қўйилди. Бу хабар тарқалишидан бир оз аввал У Бин “Телба ошиқлар” драмасида иштирок этган эди. У ерда актёр қаҳрамони саратон касаллиги туфайли бор-йўғи уч ой яшаши керак эди. Драма сюжети унинг ҳаётига кўчиши кўплаб мухлисларни ҳайратда қолдирди, улар актёрнинг ҳаётда ҳам саратонга чалинганига ишонишлари қийин бўлди.
Шифокорлар касалликни тўлиқ даволаш учун у вақтида аниқланганини хабар қилди ва Ким У Бин дарҳол интенсив терапияни бошлади. Актёр узоқ вақт давомида шоу-бизнесдан йироқда бўлди ва натижада касалликни енгишга муваффақ бўлди. Бир неча йиллик даволаниш ва реабилитациядан сўнг у аста-секин ишга қайтди. Унинг қайтиши 2020 йилда Blue Dragon Фильм мукофотини топшириш маросимидан бошланди.
Ким Санбом
Ким Санбом “Гулдан гўзал болалар” драмасидаги Со I Чон роли туфайли шуҳрат қозонган. 2018 йилда у дегенератив артритдан азият чекаётганини эълон қилди, бу хабар уни ёш ва бақувват кўришга одатланган мухлисларни ташвишга солди. Ким Санбом бу касалликка чалинишига икки сабаб бор. Биринчидан, 2009 йилда содир бўлган автоҳалокатда у жиддий жароҳатлар олган. Иккинчидан, “Падам-падам... юрак уриши” драмасидаги рол учун актёр 10 кг йўқотишга мажбур бўлган.
20 ёшидан бери дегенератив артрит билан касалланган Ким Санбом даволаниш ва мунтазам назорат орқали касаллик билан курашишда давом этмоқда.
Пак Со Дам
Парк Со Дам “Паразитлар” фильмидаги роли билан муваффақият қозонди. Мазкур фильм “Оскар”ни қўлга киритган биринчи хорижий лойиҳа бўлди.
Пак Со Дамга 2021 йилда қалқонсимон безнинг папилляр саратони ташхиси қўйилди. Саратоннинг бу тури кенг тарқалган ва даволаш мумкин бўлган касаллик бўлса-да, ташхис ҳақидаги хабар актрисанинг ўзини ҳам, мухлисларини ҳам ҳайратда қолдирди. Сўнг Пак Со Дам барча лойиҳаларини қолдириб, бутун эътиборини даволанишига қаратди. Унда саратон ўсимтасини олиб ташлаш операцияси амалга оширилди.
2023 йилда актриса “Фантом” фильмида ва “Ўлим ўйини” драмасида иштирок этиб, кинога қайтганини эълон қилди.
Ким Су Ҳён
Кўплаб мукофотларга сазовор бўлган 36 ёшли актёр Ким Су Ҳён “Кўз ёшлар қироличаси” (2024) сериали чиқишидан олдин ҳам машҳур ва бутун дунёда танилган эди. Актёрлик карьерасидаги уч йиллик танаффусдан олдин у бир нечта бошқа машҳур сериалларда, жумладан, “Орзулар” (2011), “Ой қучоғидаги қуёш” (2012), “Юлдузли одам” (2013), “Телба, лекин ҳаммаси жойида” (2020) ва “Оддий бир кунда” фильмларида рол ўйнаган.
Ким Су Ҳён 13 ёшидан бошлаб жиддий юрак касаллиги — аритмия ва тахикардиядан азият чекади, бу хасталик унинг ҳаёт сифатини сезиларли даражада ёмонлаштиради. Ушбу муаммоларни енгиш учун актёр 20 ёшида юрак операциясини ўтказди. Ҳозирда у ўз ҳолатини кузатишда давом этмоқда ва юрак фаолиятини нормал сақлаш ва кинодаги фаолиятини давом эттириш учун керакли дори-дармонларни қабул қилиб келади.
Ли Мин Ҳо ва Чон Ил У
2006 йилда Ли Мин Ҳо дўсти ва ҳамкасби Чон Ил У билан жиддий автоҳалокатга учради. Бахтсиз ҳодисада уларнинг иккиси оғир тан жароҳатлари олди. Ли Мин Ҳонинг тос суяги ва тиззаси синган, шу сабабли оёқларига металл стержен ўрнатилган.
Йўл-транспорт ҳодисаси унинг соғлиғига жиддий таъсир кўрсатди, аммо актёр тузалиб, актёрлик карьерасига қайтишга муваффақ бўлди. 2009 йилда у “Гулдан гўзал болалар” драмасида бош ролни ўйнади.
Чон Ил У ҳам аварияда оғир жароҳатлари олди, жумладан, унинг билак ва тос суяги синди, бошида ички қон кетиши бўлди. Унинг тикланиши учун тахминан етти ой вақт керак бўлди. Бироқ бахтсиз ҳодисанинг энг жиддий оқибати 2013 йилда юзага келди: унга мия аневризмаси ташхиси қўйилди. Сўнг актёр депрессияга ҳам тушиб қолди.
Барча қийинчиликларга қарамай, Чон Ил У ҳам касаллигини енгиб, актёрликка қайтди. У “Ҳечи”, “Золушка ва тўрт рицар” каби машҳур драмаларда иштирок этди.
Изоҳ (0)